Bojxona postlarida katta miqdordagi spirtli ichimliklar ushlandi
Bojxonachilar tomonidan yil boshidan buyon 11 ming litrdan ziyod spirt va alkogolli ichimliklarni noqonuniy olib kirilishiga chek qo‘yilgan. Bu haqda davlat bojxona qo‘mitasi matbuot xizmati xabar qildi.
Fuqarolar turli xil yo‘llar bilan O‘zbekiston hududiga umimiy qiymati 4 million so‘mdan 55 million so‘mgacha bo‘lgan spirtli ichimliklar olib kirishga uringan.
“Toshkent-AERO” ixtisoslashtirilgan bojxona kompleksi xodimlari tomonidan Toshkent xalqaro aeroportida aniqlangan bojxona qoidabuzarligida Moskvadan uchib kelgan yo‘lovchilardan biri 15 litr alkogolli ichimliklarni yashirincha olib kirishga uringani fosh bo‘ldi.
N.Sh. ismli ushbu shaxs aroq, martini, viski kabi 15 shisha ichimlikni “yashil yo‘lak”dan olib o‘tishga uringan. Ularning umumiy qiymati salkam 4 million so‘mni tashkil qilmoqda.
Sirdaryo viloyati bojxona boshqarmasi “Sirdaryo” chegara bojxona posti orqali qo‘shni davlatdan kirib kelgan fuqaro I.A. boshqaruvidagi yuk avtotransport vositasi ichidagi yelim idishlarning biriga 12 litr aroq, ikkinchiga esa 4 litr konyak quyilgani ma’lum bo‘ldi.
Mazkur postda muqaddam aniqlangan yana bir qonunbuzarlik holatida fuqaro B.B. boshqaruvidagi yuk avtotransport vositasining yukxonasi ko‘zdan kechirildi. Natijada, yukxonaga bojxona xodimining og‘zaki so‘rovida aytilmagan, yo‘lovchi bojxona deklaratsiyasida ko‘rsatilmagan umumiy qiymati 36 million so‘mlik, sig‘imi 1 litrlik jami 36 dona Jack Daniels viskisi ortilganligi aniqlandi.
“Ufa—Toshkent” poezdi yo‘lovchisi U.Sh. olib kirish taqiqlangan bo‘lishiga qaramay, yelim idishlarga qadoqlangan 10 litr etil spirtini olib kirishga uringan vaqtida to‘xtatib qolindi.
“Moskva—Toshkent” poezdi vagonlaridan birida esa fuqaro N.J. yashirincha olib kirish uchun 2 turdagi 18 litr aroqlarni vagon hojatxonasiga yashirgani fosh bo‘ldi.
Toshkent viloyati bojxona boshqarmasining “G‘ishtko‘prik” chegara bojxona postida fuqaro E.A. qo‘shni davlatdan kirib kelayotgan 24 nafar piyodani yollagan holda go‘yoki shaxsiy foydalanish uchun niqobi ostida salkam 14 million so‘mlik 131 shisha alkogolli ichimlikni olib kirishga uringan. To‘xtatib qolingan 14 turdagi konyar va aroqlarning umumiy hajmi esa 70 litrdan ziyoddir.
“S.Najimov” chegara bojxona postida aniqlangan yana bir holatda esa qo‘shni davlatdan kirib kelgan fuqaro S.U. boshqaruvidagi yuk avtotransport vositasiga 52 shishada jami 32 litr viski va aroq yashirilganligi fosh bo‘ldi. Bojxona nazoratidan yashirincha olib kirish vaqtida to‘xtatib qolingan mazkur alkogolli ichimliklarning umumiy qiymati 12,2 million so‘mni tashkil qilmoqda.
Taxiatosh tumanida o‘tkazilgan tezkor tadbir davomida A-380 avtomobil yo‘lida harakatlanib ketayotgan Volkswagen rusumli avtomobil to‘xtatilib, ko‘zdan kechirilganida, ushbu avtoulov saloni va unga biriktirilgan tirkamasida chet elda ishlab chiqarilgan va bojxona rasmiylashtiruvidan o‘tganligini tasdiqlovchi hujjatlari bo‘lmagan qiymati 55 million so‘mlik 181 dona shisha idishdagi jami 179,8 litr alkogol (viski va konyak) mahsulotlari borligi aniqlangan.
