O‘zbekistonda ommaviy ravishda o‘rnatilayotgan yangi elektr hisoblagichlar ko‘rsatkichlarni ko‘paytirib qayd etayotgani haqidagi e’tirozlar so‘nggi kunlarda ijtimoiy tarmoqlarda ko‘p bildirilmoqda. O‘zbekiston Energetika vazirligi ushbu holat yuzasidan izoh berdi.
Vazirlik vakillarining ta’kidlashicha, 2019-yilning iyuli so‘nggi 25 yildagi eng jazirama iyul bo‘lib tarixga kirdi. Natijada, 2018-yil iyulida Toshkent shahrida elektr energiyasi iste’moli 584,6 million kVt•soatni tashkil etgan bo‘lsa, 2019-yil iyul oyida bu raqam 647,9 million kVt•soatga teng bo‘ldi — ya’ni 63,3 million kVt•soat ko‘p elektr energiyasi iste’mol qilindi.
Qayd etishlaricha, o‘rnatilayotgan yangi hisoblagichlarda aniqlik darajasi ilgarigi induksion yoki birinchi avlodga mansub ayrim elektron hisoblagichlardan birmuncha yuqori. Misol uchun, induksion hisoblagichlarda aniqlik darajasi ±2,5 foizni tashkil etsa, yangilarida bu ±1,0 foizni tashkil etadi.
Bundan tashqari, induksion hisoblagichlarning aniqlik darajasi har besh yildan so‘ng ±5 foizga kamayadi. “Bundan kelib chiqib aytiladigan bo‘lsa, ayrim induksion hisoblagichlarda aniqlik darajasi ±10 foizga oshib ketgan bo‘lsa-da, biz hanuzgacha eski hisoblagichlardan foydalanishda davom etyapmiz”, — deyiladi vazirlik axborotida.
“Ma’lumki, ayrim noinsof iste’molchilar isitish tizimiga ‘nulevoy’ o‘tkazgich ulab olgan holda, elektr energiyasini noqonuniy tarzda iste’mol qilib keladi. Bu esa energiya tizimiga zarar yetkazilishiga, isitish quvurlarining ishdan chiqishiga, ayrim hollarda esa tok urish natijasida fuqarolarning halok bo‘lishiga sabab bo‘ladi. Hozirgi hisoblagichlar bunday holatlarda nafaqat hisoblagichdan o‘tayotgan elektr energiyasini, balki noqonuniy tarzda foydalanilayotgan qismini ham hisobga oladi”, — deyiladi Energetika vazirligi axborotida.
Qo‘shimcha qilinishicha, Sirg‘ali-2 dahasida joylashgan ko‘p qavatli uylarning birida istiqomat qiluvchi fuqaro S.A.Yu. internetga: “Hisoblagich o‘ta ko‘p miqdorda hisoblayapti”, degan sharh bilan videorolik chiqargan. Bunga javoban 9-avgust kuni soat 10:00 da “Elektron hisoblagich” qo‘shma korxonasi direktor o‘rinbosari K.Nurmatov, “Toshkent shahar elektr tarmoqlari korxonasi” direktori D.Imomov, Sirg‘ali tumani hokimi o‘rinbosari B.To‘xayev, “O‘zstandart” agentligi mutaxassisi N.Nurmuhamedov ishtirokida “taqqoslash tajribasi” o‘tkazilib, qayd etilgan natijalar bo‘yicha iste’molchiga to‘liq tushuntirish berilgan.
“Iste’mol qilingan elektr energiyasi to‘g‘ri hisoblanayotgani to‘liq tasdiqlandi. Bu jarayonda ishtirok etgan fuqaro S.A.Yu bunga iqror bo‘lib, uzr so‘ragan va internetda bu haqda sharh qoldirishga va’da bergan”, — deyiladi xabarda.
Eslatib o‘tamiz, Prezidentning 2018-yil 23-oktabrdagi “Elektr energetikasi tarmog‘ini jadal rivojlantirish va moliyaviy barqarorligini ta’minlash chora-tadbirlari to‘g‘risida”gi qaroriga muvofiq, Toshkent shahrining Yunusobod, Olmazor, Shayxontohur, Uchtepa, Mirobod va Sirg‘ali tumanlarida avtomatlashtirilgan hisoblash tizimini joriy etish maqsadida 150 nafarga yaqin xodim ishtirokida hisoblagichlarni almashtirish ishlari olib borilyapti.
Izoh (0)