Ўзбекистонда оммавий равишда ўрнатилаётган янги электр ҳисоблагичлар кўрсаткичларни кўпайтириб қайд этаётгани ҳақидаги эътирозлар сўнгги кунларда ижтимоий тармоқларда кўп билдирилмоқда. Ўзбекистон Энергетика вазирлиги ушбу ҳолат юзасидан изоҳ берди.
Вазирлик вакилларининг таъкидлашича, 2019 йилнинг июли сўнгги 25 йилдаги энг жазирама июль бўлиб тарихга кирди. Натижада, 2018 йил июлида Тошкент шаҳрида электр энергияси истеъмоли 584,6 миллион кВт•соатни ташкил этган бўлса, 2019 йил июль ойида бу рақам 647,9 миллион кВт•соатга тенг бўлди — яъни 63,3 миллион кВт•соат кўп электр энергияси истеъмол қилинди.
Қайд этишларича, ўрнатилаётган янги ҳисоблагичларда аниқлик даражаси илгариги индукцион ёки биринчи авлодга мансуб айрим электрон ҳисоблагичлардан бирмунча юқори. Мисол учун, индукцион ҳисоблагичларда аниқлик даражаси ±2,5 фоизни ташкил этса, янгиларида бу ±1,0 фоизни ташкил этади.
Бундан ташқари, индукцион ҳисоблагичларнинг аниқлик даражаси ҳар беш йилдан сўнг ±5 фоизга камаяди. «Бундан келиб чиқиб айтиладиган бўлса, айрим индукцион ҳисоблагичларда аниқлик даражаси ±10 фоизга ошиб кетган бўлса-да, биз ҳанузгача эски ҳисоблагичлардан фойдаланишда давом этяпмиз», — дейилади вазирлик ахборотида.
«Маълумки, айрим ноинсоф истеъмолчилар иситиш тизимига ‘нулевой’ ўтказгич улаб олган ҳолда, электр энергиясини ноқонуний тарзда истеъмол қилиб келади. Бу эса энергия тизимига зарар етказилишига, иситиш қувурларининг ишдан чиқишига, айрим ҳолларда эса ток уриш натижасида фуқароларнинг ҳалок бўлишига сабаб бўлади. Ҳозирги ҳисоблагичлар бундай ҳолатларда нафақат ҳисоблагичдан ўтаётган электр энергиясини, балки ноқонуний тарзда фойдаланилаётган қисмини ҳам ҳисобга олади», — дейилади Энергетика вазирлиги ахборотида.
Қўшимча қилинишича, Сирғали-2 даҳасида жойлашган кўп қаватли уйларнинг бирида истиқомат қилувчи фуқаро С.А.Ю. интернетга: «Ҳисоблагич ўта кўп миқдорда ҳисоблаяпти», деган шарҳ билан видеоролик чиқарган. Бунга жавобан 9 август куни соат 10:00 да «Электрон ҳисоблагич» қўшма корхонаси директор ўринбосари К.Нурматов, «Тошкент шаҳар электр тармоқлари корхонаси» директори Д.Имомов, Сирғали тумани ҳокими ўринбосари Б.Тўхаев, «Ўзстандарт» агентлиги мутахассиси Н.Нурмуҳамедов иштирокида «таққослаш тажрибаси» ўтказилиб, қайд этилган натижалар бўйича истеъмолчига тўлиқ тушунтириш берилган.
«Истеъмол қилинган электр энергияси тўғри ҳисобланаётгани тўлиқ тасдиқланди. Бу жараёнда иштирок этган фуқаро С.А.Ю бунга иқрор бўлиб, узр сўраган ва интернетда бу ҳақда шарҳ қолдиришга ваъда берган», — дейилади хабарда.
Эслатиб ўтамиз, Президентнинг 2018 йил 23 октябрдаги «Электр энергетикаси тармоғини жадал ривожлантириш ва молиявий барқарорлигини таъминлаш чора-тадбирлари тўғрисида»ги қарорига мувофиқ, Тошкент шаҳрининг Юнусобод, Олмазор, Шайхонтоҳур, Учтепа, Миробод ва Сирғали туманларида автоматлаштирилган ҳисоблаш тизимини жорий этиш мақсадида 150 нафарга яқин ходим иштирокида ҳисоблагичларни алмаштириш ишлари олиб бориляпти.
Изоҳ (0)