Toshkentda 8-avgust kuni Ekologiya va atrof muhitni muhofaza qilish davlat qo‘mitasi inspektorlari tomonidan reyd o‘tkazildi, deb xabar bermoqda qo‘mita matbuot xizmati.
Reyd davomida TTZ avtostansiyasi yaqinida magistral yo‘l bo‘ylab yangi kesilgan katta diametrli daraxtlarni ortib ketayotgan yuk mashinasi aniqlangan.
Yuk mashinasi ekologik nazorat va Davlat yo‘l harakati xavfsizligi xizmati xodimlari tomonidan to‘xtatilgan va olib ketilayotgan yuk ko‘zdan kechirilgan.
Unda yoshi 40—50 yillar atrofida bo‘lgan yangi kesilgan qayrag‘och daraxtlari tashilgani va yuk egasi Toshkent viloyatida yashovchi B.Soipnazarov ekanligi aniqlangan.
Yuk egasi daraxtlarning qonuniy kesilganini tasdiqlovchi hujjatni taqdim eta olmagan. Uning aytishicha, daraxtlar Qibray tumanidagi “Bo‘ston” sihatgohi hududida kesib olingan va Toshkentning Uchtepa tumanidagi “O‘rikzor” qurilish bozori yaqinida joylashgan qurilish yog‘ochini tayyorlash sexiga piloramaga olib ketayotgan bo‘lgan.
Qo‘lga olingan shaxs,shuningdek, bu noqonuniy faoliyat bilan 10 yildan ko‘proq vaqtdan beri shug‘ullanib kelishini tan olgan. Hozirda B. Soipnazarovga nisbatan huquq-tartibot idoralariga topshirish va qonunchilikka ko‘ra chora ko‘rish uchun materiallar tayyorlanmoqda.
Izoh (0)