«Реал» тарихидаги энг қиммат 5 та трансфер ҳақида

Мадриднинг «Реал» клуби XXI аср аввалидаёқ ўзининг катта трансферлари билан футбол жамоатчилиги ва мухлисларни ўзига қаратиб улгурган эди. 2019 йил ёзига келиб, «қаймоқранглилар» яна трансфер бозорида фаоллик кўрсатди. Клуб бирин-кетин ўз сафига Эдер Милитао, Родриго Гоэс, Лука Йович, Эден Азар каби футболчиларни қўшиб олди. Бироқ улардан фақат Эден Азаргина клуб тарихидаги энг қиммат трансферлар бешлигига кирди.

Қуйида «Реал» амалга оширган энг қиммат трансферлар бешлиги ҳақида суҳбатлашамиз:

1. Гарет Бэйл: «Тоттенҳэм» — «Реал», 101 миллион евро (2013)

«Тоттенҳэм»даги қойилмақом ўйинларидан сўнг уэлслик футболчи Европа грандлари оромини ўғирлади. Гаретнинг «Реал»га ўтиши ҳақидаги сериал 2013 йилнинг бутун ёзи бўйи давом этди. Бэйл бу орада ҳаттоки «Тоттенҳэм»нинг мавсумолди йиғинларини, камига мавсум стартини ҳам ўтказиб юборди. Узоқ давом этган сериалга кузнинг биринчи кунида якунига етди. «Реал» 1 сентябрь куни Бэйл трансферини расман эълон қилди. Клуб вингер учун «Тоттенҳэм»га 101 миллион еврони қуртдек санаб берди. Шу тариқа Бэйл «Реал» тарихидаги энг қиммат футболчига айланди. Гарет янги клубидаги дебют ўйинидаёқ гол уришга эришди, бироқ орадан кўп ўтмай жароҳатга йўлиқди. Мавсум сўнгига бориб эса уэлслик футболчи Криштиану Роналду ҳамда Карим Бензема билан қойилмақом триони ҳосил қилди. Бэйлнинг «Реал»даги гуллаган даври эса 2014 йил апрелидан бошланганди. Футболчи 2014 йил 16 апрель санасида «Барселона»га қарши Испания Кубоги финалида ўша машҳур голини уради. Бэйл Марк Бартрани тезликда ортда қолдирган ҳолда «Реал»га ғалаба келтирган голга муаллифлик қилади. Орадан бир ой ўтиб эса Гарет Европа Чемпионлар Лигаси финалида «Атлетико М» дарвозасига ғалаба голини уришга муваффақ бўлади. Ҳозир эса Бэйлнинг «Реал»дан кетиши мумкинлиги ҳақида хабарлар етарлича топилади. Шуниси аниқки, «Қироллик клуби» устози Зинедин Зидан Бэйлни клубнинг келаси мавсумдаги режаларига киритмаган.

2. Эден Азар: «Челси» — «Реал», 100 миллион евро (2019)

«Челси»даги 7 йиллик фаолиятидан сўнг белгиялик футболчининг болаликдаги орзулари рўёбга чиқди. «Реал» Роналду кетгач на Бэйл, Иско, Асенсио ва на Модрич жамоа етакчисига айлана олди. Буни жуда яхши тушунган Перес бобо эса Эден Азарни Мадридга олиб келишга чоғланди. Аммо тан олиш керак, Азарни «Реал»га ўтиши осон кечмади. «Челси» клубга қўйилган трансфер тақиқи сабаб белгиялик трансферига келганда клуб ишни ортга сураверди. Бироқ Мадриднинг 100 миллион евролик таклифи Роман Абрамовични ҳам кўндира олди. Эден Мадридга Европа Лигаси ғолиби ва Англия Премьер Лигасининг энг яхши ўйинчиларидан бири сифатида келди. Аммо футболчини олдинда катта синовлар кутиб тургани ҳам рост. Ахир Мадрид кўз ёшларга ишонмайди.

3. Криштиану Роналду: «Манчестер Юнайтед» — «Реал», 94 миллион евро (2009)

Нафақат «Реал» 2009 йил ёзида ўз тарихидаги  ва дунёдаги энг қиммат (ўша вақтдаги) трансферни амалга оширди, балки Роналдунинг трансфери клуб тарихидаги энг омадлиси ҳам бўлди. «Қироллик клуби» Криштиану учун «Манчестер Юнайтед» ғазнасига 94 миллион евро ўтказиб берди. Ронни Мадридга йилнинг энг яхши ўйинчиси сифатида келди. У «қаймоқранглилар» сафида қайд этиш ва эришиш мумкин бўлган барча рекорд ҳамда совринларни ўзиники қилди. Роналду «Реал» билан умумий 15 та жамоавий совринга эга чиқди. Бундан ташқари у 4 марта «Олтин тўп» соҳиби бўлди. «Реал»даги фаолиятини эса 2018 йил якунлади. Футболчи 117 миллион евро эвазига Туриннинг «Ювентус» клубига йўл олди. Унинг Мадрид клубидаги статистикаси ва қойилмақом ўйинлари эса ҳеч қачон мухлислар ёдидан чиқмаслиги аниқ — 438 та ўйин, 450 та гол.

4. Зинедин Зидан: «Ювентус» — «Реал», 77,5 миллион евро (2001)

Флорентино Перес 2001 йил ёзида трансфер бозори сиёсатини тамоман бошқа тарафга буриб юборди. Испаниялик функционер 77,5 миллион евро эвазига «Ювентус»дан Зинедин Зиданни олиб келди. Зиданнинг хариди йиллар давомида барча даврларнинг энг қиммат трансфери сифатида рейтинглардан тушмади. Зизу «Реал»даги илк мавсумидаёқ жамоанинг асосий ўйинчисига айлана олади. Ўша йили «Реал» Европа Чемпионлар Лигаси финалида «Байер Леверкузен» устидан ғалаба қозонади. Зидан эса футбол тарихидаги энг чиройли голлардан бирини уради. Франциялик футболчи Фигу, Роналдо, Бекҳем, Карлос ва Рауль каби юлдузлар вақтида ҳам жамоа етакчиси бўлиб қолди. Зизу футболчилик фаолиятига ҳам айнан «Реал»да 2006 йил якун ясади. Кейинчалик эса у клубга мураббий сифатида қайтиб, нима кароматлар кўрсатганини билсангиз керак, азиз мухлис!

5. Хамес Родригес: «Монако» — «Реал», 75 миллион евро (2014)

«Порту»да танилиб, «Монако»га йўл олган колумбиялик йигит Францияда ҳам узоқ ушланиб қолмади. Монегасклар таркибидаги 1 йиллик фаолиятдан сўнг Хамес 2014 йилги Жаҳон Чемпионатида шундай ўйин намойиш этдики, натижада Флорентино Перес колумбиялик футболчини «Реал»га чорлади. 22 июль санасида «Қироллик клуби» Хамес трансферини эълон қилди. Маълумотларга кўра, Родригез учун мадридликлар «Монако» ғазнасига 75 миллион евро ўтказиб беради. 2014/15 йилги мавсум Хамес учун «Реал»даги энг омадлиси сифатида ёдда қолди. У клуб сафида 46 та ўйин ўтказди ва 17 та гол урди. Оқибатда футболчи Ла Лигада мавсумнинг энг яхши ярим ҳимоячиси деб топилди. Зинедин Зидан «Реал» бошқарувига келгач эса футболчи захирадан майдонга тушадиган футболчига айланди. Шунга қарамай 2016/17 йилги мавсумда футболчи 32 та ўйин ўтказиб, 11 та гол урди ва 13 та голли узатмани амалга оширди. 2017 йилнинг 11 июлида эса Хамес 2 йиллик ижара шарти билан «Бавария» сафига ўтди. Мюнхенликлар эса 2019 йил ёзида футболчини 40 миллион еврога сотиб олиш имкониятидан фойдаланмади. Айни дамда Хамес «Реал» ихтиёрига қайтган. Бироқ унинг клубдан кетиши овоза қилинмқда. Родригеснинг хизматларига эса «Наполи» ҳамда «Атлетико Мадрид» жиддий қизиқиш билдирган.