Namangan viloyatining Norin tumani markazi — Haqqulobodda Uztex kompaniyasi homiyligida zamonaviy maktabgacha ta’lim muassasasi foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.
Buning uchun kompaniya tomonidan 4,3 milliard so‘m sarflandi.
Bu Uztex Namanganda qurgan ikkinchi bog‘cha hisoblanadi.
160 o‘ringa mo‘ljallangan va 50-MTM etib belgilangan mazkur bog‘cha korxona tomonidan to‘liq jihozlanib, Maktabgacha ta’lim vazirligi ixtiyoriga topshirildi.
Muassasada 30 nafardan ortiq kishi doimiy ish o‘rniga ega bo‘ldi.
— Norinda salkam 13 ming nafar bog‘cha yoshidagi bola bo‘lib, ularning 60 foizi maktabgacha ta’lim muassasalariga qamrab olingan. Jami 74 ta MTM, ularning 50 tasi davlat, 1 tasi davlat-xususiy sheriklik, 2 tasi nodavlat, 21 tasi oilaviy muassasadir. Yangi bog‘chaga kelsak, bu yerda Uztex Norin filiali ishchi-xizmatchilari va boshqa hamyurtlarimiz farzandlari uchun barcha shart-sharoitlar yaratilgan. Musiqa zali, mashg‘ulot xonalari, yozgi basseyn va ayvonchalar, o‘yin va sport maydonchalari tarbiyalanuvchilar ixtiyorida, — deydi tuman MTM bo‘limi mudiri Sabohat Hojiboyeva.
Bog‘chaning ochilish marosimida viloyat hokimi Xayrullo Bozorov, sektor rahbarlari, Uztex kompaniyasi rahbariyati ishtirok etdi. Qurilish ishlarida jonbozlik ko‘rsatganlarga sovg‘alar topshirildi.
Izoh (0)