Наманган вилоятининг Норин тумани маркази — Ҳаққулободда Uzteх компанияси ҳомийлигида замонавий мактабгача таълим муассасаси фойдаланишга топширилди. Бу ҳақда «Дарё» мухбири Азизбек Абдувалиев хабар бермоқда.
Бунинг учун компания томонидан 4,3 миллиард сўм сарфланди.
Бу Uzteх Наманганда қурган иккинчи боғча ҳисобланади.
160 ўринга мўлжалланган ва 50-МТМ этиб белгиланган мазкур боғча корхона томонидан тўлиқ жиҳозланиб, Мактабгача таълим вазирлиги ихтиёрига топширилди.
Муассасада 30 нафардан ортиқ киши доимий иш ўрнига эга бўлди.
— Норинда салкам 13 минг нафар боғча ёшидаги бола бўлиб, уларнинг 60 фоизи мактабгача таълим муассасаларига қамраб олинган. Жами 74 та МТМ, уларнинг 50 таси давлат, 1 таси давлат-хусусий шериклик, 2 таси нодавлат, 21 таси оилавий муассасадир. Янги боғчага келсак, бу ерда Uzteх Норин филиали ишчи-хизматчилари ва бошқа ҳамюртларимиз фарзандлари учун барча шарт-шароитлар яратилган. Мусиқа зали, машғулот хоналари, ёзги бассейн ва айвончалар, ўйин ва спорт майдончалари тарбияланувчилар ихтиёрида, — дейди туман МТМ бўлими мудири Сабоҳат Ҳожибоева.
Боғчанинг очилиш маросимида вилоят ҳокими Хайрулло Бозоров, сектор раҳбарлари, Uzteх компанияси раҳбарияти иштирок этди. Қурилиш ишларида жонбозлик кўрсатганларга совғалар топширилди.
Изоҳ (0)