Президент Шавкат Мирзиёев мутасадди вазирликларга энергия ресурслари тарифлар нархини оширишдан аввал харажатларни асослантиришни вазифа қилиб берган. Бу ҳақда 1 август куни Молия вазири журналистлар билан бўлиб ўтган очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Молия вазири Жамшид Қўчқоровнинг маълум қилишича, Президент Шавкат Мирзиёевга киритилган қарор лойиҳасида аслида энергия ресурслари тарифларига жуда ҳам баланд нарх таклиф қилинган. Нарх-навони ишлаб чиқишга молия ва энергетика вазирлиги масъул бўлган.«Президент олдимизга савол қўйдилар: ‘Хўп, нархни оширмоқчисизлар экан, аввал уларнинг (‘Ўзтрансгаз’ АЖ ва ‘Ўзбекэнерго’ АЖ — таҳр.) харажати асосланганми ёки йўқми, уларнинг ичида заҳиралар борми ёки йўқми? Мана шу иккита савол билан бизни қайтарди. Аслида бу нархлар 1 июлда қабул қилиниши керак эди. Шунинг учун бу орада «Ўзбекнефтгаз» компаниясини ислоҳ қилиш бўйича Президентнинг қарорлари чиқди», — деди молия вазири.
Жамшид Қўчқоровнинг қўшимча қилишича, буларнинг ҳаммаси бир-бирига боғлиқ, чамбарчас, бир-бирига киришиб кетган масалалардир.
«Мана шулардан хулоса қилиб яна бир бор айтаман, бу объектив ҳолат. Худди баҳордан кейин ёз келганидек, ёздан кейин куз келгандек. Қарорнинг чиқиши ё менга, ё кимгадир, ё энергетика вазирига боғлиқ эмас. Яна бир бор айтаман бозор иқтисодиёти қурмоқчи бўлсак, бозор иқтисодиётида нархлар эркин бўлиши керак», — деди Қўчқоров.
Олдинроқ, Ўзбекистон молия вазири энергетика тизимида коррупция ва иш тизимидаги камчиликлар энергия ресурслари тарифларига қай даражада таъсир ўтказаётгани ҳақида изоҳ бергани ҳақида хабар берган эдик.
Изоҳ (0)