Yakkabog‘ tumani hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari Mansur Tuymayevning hayotiga suiqasd qilganligida ayblanuvchi tadbirkor Bahriddin Isomov ayni paytda Toshkentda sud-psixiatriya ekspertizasini o‘tmoqda. Bu haqda O‘zbekiston Bosh prokuraturaga tayanib, “Gazeta.uz” xabar berdi.
Yakkabog‘ tumani prokuraturasi yuqorida qayd qilingan holat yuzasidan 20-iyul kuni Bahriddin Isomovga nisbatan Jinoyat kodeksining 25 va 97-moddasi 1-qismi bilan jinoyi ish qo‘zg‘atgan.
Isomovning himoya huquqi ta’minlanib, himoyachisi Sh.G‘oyirov ishtirokida gumon qilinuvchi tariqasida so‘roq qilingan. 21-iyul kuni Isomov Jinoyat protsessual kodeksning 221-moddasi tartibda ushlanib, bu haqida yaqin qarindoshlariga ma’lum qilingan va qarindoshlari tomonidan olib kelingan kiyim kechak va oziq-ovqat mahsulotlari bilan ta’minlangan.
22-iyul kuni Isomovga ayb e’lon qilinib, qamoqqa olish tarzidagi ehtiyot chorasi qo‘llanilgan. Ayblanuvchi qarindoshlari tomonidan taklif qilingan himoyachisi X.Jabborov bilan holi uchrashishiga sharoit yaratib berilgan.
Isomovga nisbatan sud-psixiatriya ekspertizasiga tayanib, Jinoyat ishlari bo‘yicha Yakkabog‘ tumani sudining 22-iyuldagi ajrimi bilan statsionar tartibda sud-psixiatriya ekspertizasi o‘tkazish uchun Toshkentga yuborilgan. Shu kuni unga turmush o‘rtog‘i Nodira Haydarova va o‘g‘li Sharofiddin Daminov bilan uchrashuv tashkil qilingan.
Izoh (0)