Axborot va ommaviy kommunikatsiyalar agentligida o‘tkazilgan Davlat test markazi direktori Majid Karimov ishtirokidagi matbuot anjumanida imtihonlarning ochiqligi va korrupsiya masalalariga ham to‘xtalib o‘tildi. Bu haqda “Daryo” muxbiri Madina Nurman xabar bermoqda.

Foto: “Daryo” / Madina Nurman

“Respublika Korrupsiyaga qarshi kurashish komissiyasi tomonidan yo‘lga qo‘yilayotgan “Korrupsiyasiz oliy ta’lim” dasturining birinchi bosqichida biz ham ishtirok etyapmiz. 2019-yil noyabr oyidan boshlab Davlat test markazi savollar bazalari jamoatchilik uchun ochib qo‘yilishini birinchi qadam, desak bo‘ladi.

Ma’lumki, biz yopiq tartibda faoliyat yuritamiz. 2—3-iyuldan e’tiboran bevosita test jarayonlariga aloqador xodimlar, ekspertlar guruhlari tashqi muhitdan izolyatsiya qilingan holda ishlamoqda. Ularda aloqa vositalari, statsionar telefon vositalari ham shaxslar bilan muloqotni cheklash uchun qo‘yilmagan. Endi esa jarayonning ochiq va shaffofligini ta’minlash uchun dastur tayyorlab, test amaliyotidagi barcha vazifa, funksiyalarni umumxalq e’tiboriga namoyish etish rejamiz bor. Albatta, endi bular kelgusi yildan infratuzilma, sharoit yaratilgach OAVning yoritishi, onlayn tartibda ko‘rsatish uchun testlar ishlanganidan tortib, tekshirilish jarayonigacha qanday yo‘nalishda borishini namoyish etmoqchimiz.”

Abituriyentlarni hujjat olmasdan ro‘yxatdan o‘tkazish, qabul jarayonida ularning suratlari bevosita Ichki ishlar organlari tizimidan elektron tarzda yuklanishi, test sinovlariga kirish vaqtida Face-nazorat, baxsli holatda barmoq izi tekshiruviga murojaat qilinishi, binolardagi 1 155 tadan ortiq videokuzatuv kameralari, 120 dona mobil aloqalarini to‘suvchi qurilma, abituriyentlar sonidan kelib chiqqan holda metalloramalar o‘rnatilishi DTM Bosh boshqarma boshlig‘i Barno Rajabov tomonidan imtihonlarning qonun doirasida shaffof o‘tishining ta’minlashini qo‘shimcha qildi.

Bundan tashqari, test jarayonlariga OAV, deputatlar, jamoatchilik vakillari 2 smenada kirib kuzatishi ota-onalarning o‘tgan yili onlayn tarzda ko‘rib bildirgan e’tirozlari asosida qo‘llanilayotgani aytildi. Ayni amaliyotdan ko‘zlangan maqsad birinchidan abituriyentlarga xalaqit bermaslik bo‘lsa, ikkinchidan testga aloqador bo‘lmagan shaxslarning abituriyentlarga yordam berishga bo‘lgan intilishlarini bartaraf qilishga qaratilganiga urg‘u berildi.