Маҳмуд Абдижалиев: Давлат хизматлари кўрсатиш соҳасида 58 та идоранинг маълумотлар омбори рақамлаштирилиши керак

25 июль куни Олий Мажлис Сенати суд-ҳуқуқ масалалари ва коррупцияга қарши курашиш қўмитасининг мажлиси бўлиб ўтди. Унда Адлия вазирлигининг жорий йил биринчи ярим йиллигида амалга оширилиши белгиланган мақсадли вазифаларнинг ижро этилиши бўйича ҳисоботи эшитилди, деб хабар берди «Дарё» мухбири Мадина Нурман.

Ҳисоботдан сўнг қонун чиқарувчи палата вакиллари вазирлик тизимидаги ташкилотларнинг вакилларидан мавжуд муаммо ҳамда камчиликлар борасидаги таклифлар тингланди. Айни мулоқот баҳс-мунозара ва муҳокамалар тарзида ўтди.

Жумладан, Давлат хизматларини жорий қилиш ва ривожлантириш бошқармаси бошлиғи Маҳмуд Абдижалиев рақамлаштириш мавзусига тўхталиб ўтди:

«Биздаги энг асосий масала давлат хизматларини кўрсатишда инсон омилини камайтириш. Нафақат ФХДЁ органлари, балки ҳамма давлат органлари маълумотлар базаларини рақамлаштиришимиз лозим. Интеграция қилдик, давлат хизматларига зарур бўлган 1,5 миллиарддан ортиқ маълумотлар рақамлаштирилмаган.

Масалан, биргина мисол, ИИВдан судланганлик тўғрисида маълумотлар рақамлаштирилгани туфайли бугунги кунда судланган-судланмаганлик ҳақидаги маълумот 5 дақиқада берилмоқда. Авваллари бу маълумотни олиш учун 15 кун, ҳатто 1 ойлаб вақт кетар эди. Айни дамда 100 дан ортиқ давлат хизматлари кўрсатиладиган бўлса, шулардан 58 та идоранинг маълумотлар омборини ҳали рақамлаштириш керак. Айни масала бевосита маблағ, штат, архивлаштириш муаммоларига бориб тақалади.

Давлат хизматлари 2 хил усулда кўрсатилишини инобатга олсак, марказимиз белгиланган базадан кириб маълумотни дарҳол олиб бериши керак. Ҳозир эса база ўша идораларда рақамлаштирилмагани сабабли ариза тўлдирилади, юборилади, кутилади, муддат чўзилади. Натижада мурожаат этувчиларнинг норозилигини келтириб чиқаради. Қурилаётган марказларимизда ҳам вақти келиб фуқароларимиз келиб юрмаслиги учун, максимал даражада электронлаштиришга катта эътибор қаратишимиз лозим бўлади. Ҳозирда Ягона интерактив давлат  портали орқали хизматлар жорий этиш бир вақтнинг ўзида олиб бориляпти. Ўтган йили, масалан, рўйхатдан ўтказишни оладиган бўлсак, 90% қисми марказлардан, 10% қисми Ягона интерактив давлат хизматлари портали орқали бўлган».