Toshkentning Yashnobod tumanida joylashgan namunali harbiy shaharcha — “Olmos” mahalla fuqarolar yig‘inida istiqomat qilayotgan harbiy xizmatchilar oilalari o‘rtasida “Namunali harbiy oila” va “Namunali hudud” tanlovi o‘tkazildi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.
Tanlovda harbiy xizmatchilar orasida sog‘lom turmush tarzini keng targ‘ib qilish, sog‘lom ma’naviy-axloqiy muhitni shakllantirish, oilaviy munosabatlarni mustahkamlash, xotin-qizlar hamda harbiy xizmatchilarning oila a’zolarining bo‘sh vaqtini unumli o‘tkazdirish, ilg‘or tajribalarni ommalashtirish, ularning huquqiy bilim va saviyasini oshirish maqsadida tashkil qilindi.
Mingdan ortiq xonadon istiqomat qiladigan shaharchadagi oilalarning tozaligi, saranjom-sarishtaligi, oila bekasining o‘z qiziqishlaridan kelib chiqqan holda olib borayotgan qo‘shimcha, kasanachilik, tikuvchilik, tadbirkorlik kabi mehnatlari mahsuli, farzandlarining o‘qishi, sport va madaniyat sohasidagi erishgan yutuqlari ham inobatga olindi.
Uzoq davom etgan o‘rganishlar, taqqoslashlar, muhokama va natijalar asosida shartnoma bo‘yicha harbiy xizmatchilar, oddiy askarlar – Zafar Raimov oilasi 1-, Ulug‘bek Avulov oilasi 2-, Nodir O‘sarov xonadoni 3-o‘ringa munosib topildi. “Namunali hudud” yo‘nalishida esa mahalla faollari Malohat Badalova, Dilorom Xoliqova, Umida Dehqonovaga tashakkurnomalar topshirildi.
Sovrindorlarga Faxriy yorliq, tashakkurnoma va qimmatbaho sovg‘alarni Mudofaa vazirining o‘rinbosari general-mayor Azizbek Ikramov, Respublika Mudofaa sanoati bo‘yicha davlat qo‘mitasi raisi o‘rinbosari Hotamjon Yusupov topshirdi. Shundan so‘ng vazir o‘rinbosari namunali oila sohiblarining xonadonlarida bo‘lib, ularning turmush tarzi bilan tanishdi va farzandlari bilan suhbat qildi.
Tanlov so‘ngida yig‘ilganlar uchun Qurolli Kuchlar Markaziy ashula va raqs ansambli tomonidan konsert dasturi namoyish etildi.
Izoh (0)