9-10-iyul kunlari Samarqand shahrida o‘tkazilgan MDH mamlakatlari Turizm kengashining navbatdagi yig‘ilishida turizm sohasi bilan bog‘liq turli masalalar, davlatlar o‘rtasida yaqin yillarda hamkorlikni rivojlantirishga oid chora-tadbirlar strategiyasini amalga oshirish, Silk Way yagona viza tizimining kiritilishi muhokama qilindi. Bu haqda “Daryo” muxbiri Sevara Nishonova xabar berdi.
Kengash yig‘ilishi yakunida uning a’zolari MDH Birinchi turistik yarmarkasining yuqori darajada o‘tgani va ushbu tadbirning bundan keyin davomli ravishda o‘tkazilishi MDH mamlakatlari o‘rtasidagi hamkorlik aloqalarini yanada mustahkamlash, ularning turizm sanoatini yaxshilash hamda ahil qo‘shnichilik aloqalarini qo‘llab-quvvatlash imkonini berishi ta’kidlandi.
MDH mamlakatlari I turistik yarmarkasi doirasida MDHga a’zo mamlakatlarning turistik tashkilotlari o‘rtasida 54 dan ziyod shartnoma imzolandi.
Yig‘ilish doirasida taklif etilgan barcha loyihalar, shuningdek O‘zbekiston tomonning har yili MDH mamlakatlari turistik yarmarkasini o‘tkazishni yo‘lga qo‘yishga oid taklifi Kengash a’zolari tomonidan qo‘llab-quvvatlandi. MDH mamlakatlarining keyingi turistik yarmarkasi Qozog‘istonning Nursulton shahrida o‘tkazilishiga kelishildi.
Izoh (0)