9-10 июль кунлари Самарқанд шаҳрида ўтказилган МДҲ мамлакатлари Туризм кенгашининг навбатдаги йиғилишида туризм соҳаси билан боғлиқ турли масалалар, давлатлар ўртасида яқин йилларда ҳамкорликни ривожлантиришга оид чора-тадбирлар стратегиясини амалга ошириш, Silk Way ягона виза тизимининг киритилиши муҳокама қилинди. Бу ҳақда «Дарё» мухбири Севара Нишонова хабар берди.
Кенгаш йиғилиши якунида унинг аъзолари МДҲ Биринчи туристик ярмаркасининг юқори даражада ўтгани ва ушбу тадбирнинг бундан кейин давомли равишда ўтказилиши МДҲ мамлакатлари ўртасидаги ҳамкорлик алоқаларини янада мустаҳкамлаш, уларнинг туризм саноатини яхшилаш ҳамда аҳил қўшничилик алоқаларини қўллаб-қувватлаш имконини бериши таъкидланди.
МДҲ мамлакатлари I туристик ярмаркаси доирасида МДҲга аъзо мамлакатларнинг туристик ташкилотлари ўртасида 54 дан зиёд шартнома имзоланди.
Йиғилиш доирасида таклиф этилган барча лойиҳалар, шунингдек Ўзбекистон томоннинг ҳар йили МДҲ мамлакатлари туристик ярмаркасини ўтказишни йўлга қўйишга оид таклифи Кенгаш аъзолари томонидан қўллаб-қувватланди. МДҲ мамлакатларининг кейинги туристик ярмаркаси Қозоғистоннинг Нурсултон шаҳрида ўтказилишига келишилди.
Изоҳ (0)