“Daryo” o‘tib borayotgan haftaning qizg‘in bahslarga sabab bo‘lgan tvitlarni diqqatingizga havola etadi.
“Qadrli Aleksandr Vuchich, barchaga ma’lum bo‘lgan Shimoliy Kosovodagi vaziyatni izdan chiqarishni ko‘zda tutuvchi ssenariyingizni amalga oshirmaslikka chaqiraman. Soxta ‘ijtimoiy inqiroz’ sizning vaziyatni izdan chiqaruvchi maqsadlaringizga himoya bo‘la olmaydi, siz javobgarlikka tortilasiz”, – Ramush Xaradinay, Kosovo bosh vaziri.
Aleksandr Vuchich – serbiyalik davlat arbobi, 2017-yil 1-iyundan Serbiya prezidenti.
“Ajoyib yangilik: Britaniya Eron nefti ortilgan va Yevropa Ittifoqi sanksiyalariga qaramasdan, Suriyaga qarab yo‘l olgan Grace I qudratli tankerini qo‘lga oldi. Amerika va uning ittifoqchilari bundan keyin ham Tehron va Damashqning noqonuniy oldi-sotdisiga aralashaveradi”, – Jon Bolton, AQSh prezidentining milliy xavfsizlik masalalari bo‘yicha maslahatchisi.
“Reuters axborot agentligi xabariga ko‘ra, Putin Rim papasi bilan uchrashuvga 50 daqiqadan ko‘proq kechga qoldi. Papa hayron ham bo‘lmadi: ularning 2013-yildagi dastlabki uchrashuvida Putin 50 daqiqaga kechga qolgandi. 2015-yildagi ikkinchi uchrashuviga Putin bir soat kechikib kelgan edi”, – Yussi Nimelyaynen, Helsinki Sanomat nashri muxbiri.
“Putin xalqaro anjumanlarga kech qolishni yoqtiradi. 2003–2016-yillarda Putin kechga qolgan tadbirlar infografikasi”, – Yari Yumponnen, Moskvadagi fin kompaniyasi xodimi.
“Bu saylov oddiy yechimga olib boradi: o‘zgarishlar yoki eski hammom, eski tos yoki bundan-da battarrog‘i. Iltimos, menga ovoz bering, toki Brexit masalasi 31-oktabrga qadar hal qilinishini ta’minlay, mamlakatni birlashtirib, Jeremi Korbinni mag‘lub etay”, – Boris Jonson, Buyuk Britaniya bosh vazirligiga nomzod.
“Bugun Zelenskiy bilan birgalikda Luganskdagi qishloqda bo‘ldim. Rus urushi qopqoniga tushib qolgan mahalliy aholiga insonparvarlik yordami ko‘rsatilishi halokatli ahvolda. Ukraina sharqida fojia davom etmoqda. Mard ukrain askarlari, YeXHT a’zolari va insonparvarlik yordami ko‘rsatuvchi tashkilotlar vakillari bilan uchrashuv”, – Donald Tusk, Yevropa Kengashi prezidenti.
“Eron, Xitoy va Shimoliy Koreya o‘zlariga savol beradi: Tramp bilan kelishuv imzolasakmikin? Yoki uning prezidentlik muddati tugashini kutib tursakmikin?” – Ien Bremmer, Time sharhlovchisi.
“YuNESKO Rossiyaning Pskov shahridagi yodgorliklarni Butunjahon merosi ro‘yxatiga kiritdi. Pskov o‘rta asrlarga oid yodgorliklari bilan o‘ziga maftun etadi”, – Roland Olifant, jurnalist.
“Rossiya hukumati Xitoyni Yevropa bilan bog‘lovchi 2 ming kilometrli avtomobil yo‘li qurilishiga 9,4 milliard dollar mablag‘ ajratadi”, – Lusian Kim, NPR muxbiri.
“Turkmaniston davlat ishchilariga narxlari nihoyatda qimmatligidan bo‘shab qolgan ‘Avaza’ oromgohidan sayohat paketlarini sotib olishni talab qilmoqda”, – Farangiz Najibulloh, “Ozod Yevropa” radiosi Tojik xizmati muxbiri.
“Yaqinda e’lon qilingan soliq to‘lovlari hisobotlariga ko‘ra, Jo Bayden hozirda millionerlar klubi a’zosiga aylandi. Bayden prezident ma’muriyatini tark etganidan so‘ng u va uning rafiqasi dastlabki ikki yil ichida 15 million dollardan ko‘proq mablag‘ ishlab topgan”, – New York Times nashri.
Jahongir Ergashev tayyorladi.
Izoh (0)