Mo‘ynoqdagi Sudoche ko‘lida sodir bo‘lgan yong‘in sabablari ma’lum qilindi

Ijtimoiy tarmoqlarda Qoraqalpog‘istondagi Sudoche ko‘lida yong‘in sodir bo‘lganligi haqida foto va videolar paydo bo‘ldi.

Ma’lum bo‘lishicha, Qoraqalpog‘istonning shimoli-g‘arbida joylashgan mazkur ko‘lda yong‘inning yuz berishiga tabiiy ofat sabab bo‘lgan.

Sudoche ko‘liga egalik qiluvchi “Mo‘ynoq akva sanoat” DUK rasmiylarining xabar qilishicha, yong‘in ko‘lning suvi yo‘q yoki sayoz joylardagi qamishzorlarda sodir bo‘lgan. Yong‘in 4-iyul kungi chaqmoq urishidan keyin boshlangan va kelgusi kuni ham kechgacha davom etgan. Olov shamol kuchi bilan vaqti-vaqti kuchayib, ko‘lami kengayib borgan.

Qoraqalpog‘iston Respublikasi Ekologiya va tabiatni muhofaza qilish qo‘mitasi raisi Turg‘anbay Xojanazarovning ta’kidlashicha, hozirda Sudoche ko‘liga yong‘inning tabiatga yetkazgan zararini aniqlash uchun guruh jo‘natilgan.

Ta’kidlab o‘tish joiz, yong‘in haqida mutasaddi organlar ijtimoiy tarmoqlarda foto va videolar tarqagandan so‘ng xabar topgan.

— Sudocheda joriy yilda suv kam bo‘ldi, — deydi “Mo‘ynoq akva sanoat” DUK direktori Ruslan Mambetkadirov. — Suvsizlikdan qurg‘ab turgan qamishlar tezda alanga olib ketgan bo‘lishi mumkin. Hozirgi paytda ko‘chmanchi qushlar shimolga uchib ketgan. Bu yong‘inning hayvonot olamiga aytarlik zarar qilmaganligiga umid qilamiz.