Аvval xabar berganimizdek, Shavkat Mirziyoyev raisligida 5-iyul kuni birinchi yarim yillikda davlat budjetiga tushumlar natijadorligini tahlil qilish va yangi vazifalarni belgilash masalalariga bag‘ishlangan videoselektor yig‘ilishi o‘tkazildi.
“Kun.uz” manbasining xabar qilishicha, yig‘ilish yakunida Prezident Andijon viloyati hokimi Shuhratbek Abdurahmonovni tanqid qilgan.
Prezident internetda viloyat hokimi bilan bog‘liq xabarlarni kuzatganini, Andijon viloyatida ijtimoiy sohada amalga oshirilayotgan ishlardan ko‘ngli to‘lmayotganini aytib o‘tgan.
“Seni hurmat qilaman. Lekin internetdagi gaplar dilimni og‘ritdi. Og‘ir-bosiq bo‘l. Sadoqat boshqa, amal boshqa”, — degan Prezident.
O‘z navbatida hokim yo‘l qo‘ygan xatolarini tushunib yetganini aytib, bu holat uchun uzr so‘ragan va bunday holat boshqa takrorlanmasligiga va’da bergan.
Qayd etish kerakki, Andijon viloyati va viloyat hokimi so‘nggi vaqtlarda OAV e’tiborida bo‘lib turibdi.
Avvaliga, may oyida Prezidentning Andijon viloyatiga tashrifi vaqtida ko‘zbo‘yamachilik qilingani haqida xabarlar shov-shuv bo‘lgandi. Unga ko‘ra, 6 nafar ayolga Prezident sovg‘asi sifatida kottejlar berilishi va’da qilingani, lekin davlat rahbari Toshkentga qaytgach, ulardan uylar qaytarib olingani ma’lum bo‘lgandi.
Iyun oyida Shuhratbek Abdurahmonov viloyat hokimligida o‘tkazilgan yig‘ilishda boshqa mansabdorlarni (xususan, sog‘liqni saqlash vaziri Alisher Shodmonovni) qo‘pol so‘zlar bilan haqorat qilgani haqidagi audio tarqaldi.
Izoh (0)