Мўйноқдаги Судочье кўлида содир бўлган ёнғин сабаблари маълум қилинди

Ижтимоий тармоқларда Қорақалпоғистондаги Судочье кўлида ёнғин содир бўлганлиги ҳақида фото ва видеолар пайдо бўлди.

Маълум бўлишича, Қорақалпоғистоннинг шимоли-ғарбида жойлашган мазкур кўлда ёнғиннинг юз беришига табиий офат сабаб бўлган.

Судочье кўлига эгалик қилувчи «Мўйноқ аква саноат» ДУK расмийларининг хабар қилишича, ёнғин кўлнинг суви йўқ ёки саёз жойлардаги қамишзорларда содир бўлган. Ёнғин 4 июль кунги чақмоқ уришидан кейин бошланган ва келгуси куни ҳам кечгача давом этган. Олов шамол кучи билан вақти-вақти кучайиб, кўлами кенгайиб борган.

Қорақалпоғистон Республикаси Экология ва табиатни муҳофаза қилиш қўмитаси раиси Турғанбай Хожаназаровнинг таъкидлашича, ҳозирда Судочье кўлига ёнғиннинг табиатга етказган зарарини аниқлаш учун гуруҳ жўнатилган.

Таъкидлаб ўтиш жоиз, ёнғин ҳақида мутасадди органлар ижтимоий тармоқларда фото ва видеолар тарқагандан сўнг хабар топган.

— Судочьеда жорий йилда сув кам бўлди, — дейди «Мўйноқ аква саноат» ДУK директори Руслан Мамбеткадиров. — Сувсизликдан қурғаб турган қамишлар тезда аланга олиб кетган бўлиши мумкин. Ҳозирги пайтда кўчманчи қушлар шимолга учиб кетган. Бу ёнғиннинг ҳайвонот оламига айтарлик зарар қилмаганлигига умид қиламиз.