OIV infeksiyasiga chalingan mehnat migrantlarining 94,1 foiziga kasallik jinsiy yo‘l bilan yuqqanligi aniqlangan. Oqibatda kasallik ularning turmush o‘rtog‘iga va oila-a’zolariga yuqishiga sabab bo‘lmoqda deb xabar beradi Sputnik.
Sputnik’ning yozishicha, Sog‘liqni saqlash vazirligi tomonidan “Odamning immunitet tanqisligi virusiga tibbiy tekshiruvdan o‘tkazish qoidalarini tasdiqlash to‘g‘risida” hukumat qarori loyihasini tayyorlab, umumiy muhokamaga qo‘yilgan. Qaror loyihasiga Odamning immunitet tanqisligi virusiga tibbiy tekshiruvdan o‘tkazish qoidalari ilova qilingan.
“Tibbiyot muassasasi fuqarolarni o‘zini o‘zi boshqarish organlari tomonidan tibbiyot muassasasiga yo‘naltirilgan, uch oydan ortiq muddatda xorijiy davlatlarda bo‘lib qaytgan shaxslarni OIVga ekspress usulida tibbiy tekshiruvdan o‘tishlarini ta’minlasin”, — deyilgan hujjatda.
Loyihada uch oydan ortiq muddatda xorijiy davlatlarda bo‘lib qaytgan shaxslarni OIVga tibbiy tekshiruvdan o‘tkazish uchun ekspress test-sistemalar va boshqa sarflanuvchi materiallarni xarid qilish uchun Sog‘liqni saqlash vazirligi taqdim etgan hisob-kitoblar asosida har yili yetarlicha mablag‘ ajratilishi haqida Moliya vazirligiga topshiriq berilgan.
“Mehnat migrantlari kasallikni yuqtirib olgandan so‘ng, o‘z yurtiga qaytganida uni oila-a’zolariga yuqtirishi ehtimoli mavjud. O‘z yurtiga deportatsiya qilingan OIV infeksiyasini yuqtirib olgan shaxslar o‘zining OIV bo‘yicha maqomini sir tutadi, bu bilan o‘z turmush o‘rtoqlarini xavf ostiga qo‘yadi. Natijada OIV infeksiyali farzandlarning tug‘ilishi va kasallik aholining umumiy qatlamiga o‘tishiga sabab bo‘ladi”, — deyilgan Sog‘liqni saqlash vazirligi axborotida.
O‘tgan 2018-yilni 11 oyi davomida 422471 nafar shaxs xorijiy davlatlarga chiqib faoliyat yuritganligini aytib, OIV infeksiyasiga tekshiruvdan o‘tkazilgan.
2018-yilni 11 oyida 571 nafar mehnat migrantida OIV infeksiyasi aniqlangan bo‘lsa, bu ko‘rsatkich 2017-yilni 11 oyida 525 nafarni tashkil etgan bo‘lib kasallanish ko‘rsatkichi 8,0 foizga ortgan.
2017-yilda o‘tkazilgan maxsus epidemiologik tadqiqotlar ko‘rsatdiki, OIV infeksiyasining migrantlar orasida tarqalganlik darajasi Andijon va Urganch shaharlarida 2,3%ni, Buxoro shahrida 1,3%ni, Kitob va Samarqand shaharlarida 1,0%ni tashkil etgan.
Izoh (0)