Jahongir Ortiqxo‘jayev: “Genplan har doim ham iqtisodiy, siyosiy yoki boshqa rivojlanishlarga yordam beradi, degani emas”

Toshkent shahar hokimligi vakillari 2019-yil fevralida poytaxtning amaldagi Bosh plani (Genplan) 2014-yilda ishlab chiqilgani, biroq bugunga kelib dolzarbligini yo‘qotgani, yangi Bosh plan konsepsiyasi 2019-yilning aprel oyi oxirigacha 3D formatda tayyorlanishi, buning ustida Xitoy, Turkiya va Buyuk Britaniya kompaniyalari ishlayotgani haqida xabar berilgan edi. Keyinroq Bosh plan konsepsiyasini taqdim etish muddati may oyiga surilgani ma’lum qilindi.

Iyun oyida esa Qurilish vazirligi vakillari Toshkentning Bosh plani konsepsiyasi Turkiya va Britaniya kompaniyalari bilan hamkorlikda tayyorlanayotgani, ishlab chiqilgandan keyin mas’ul mutaxassislar jalb etilgan holda ko‘rib chiqilishi va 1,5—2 oy ichida tayyor bo‘lishini qo‘shimcha qilgandi. Toshkent shahar hokimi Jahongir Ortiqxo‘jayev esa 29-iyun kuni jurnalistlar bilan bo‘lib o‘tgan muloqotda Bosh plan eng asosiy muhim masala emasligini ta’kidladi, deya xabar bermoqda “Daryo” muxbiri.

“Genplan lozim, deb o‘ylamayman. Hozir ‘Bosh reja bo‘lsa, hayotimiz ertaga rivojlanib qoladi’, degan tushuncha yuribdi. Bosh reja har doim ham iqtisodiy va siyosiy yoki boshqa rivojlanishlarga yordam beradi, degan gap emas”, — dedi hokim Jahongir Ortiqxo‘jayev, yangi Bosh plan konsepsiyasi hali ham tasdiqlanmagan shaharni strategik rivojlantirishga qanchalik ta’sir ko‘rsatayotgani haqidagi savolga javob berarkan.