Тошкент шаҳар ҳокимлиги вакиллари 2019 йил февралида пойтахтнинг амалдаги Бош плани (Генплан) 2014 йилда ишлаб чиқилгани, бироқ бугунга келиб долзарблигини йўқотгани, янги Бош план концепцияси 2019 йилнинг апрель ойи охиригача 3D форматда тайёрланиши, бунинг устида Хитой, Туркия ва Буюк Британия компаниялари ишлаётгани ҳақида хабар берилган эди. Кейинроқ Бош план концепциясини тақдим этиш муддати май ойига сурилгани маълум қилинди.
Июнь ойида эса Қурилиш вазирлиги вакиллари Тошкентнинг Бош плани концепцияси Туркия ва Британия компаниялари билан ҳамкорликда тайёрланаётгани, ишлаб чиқилгандан кейин масъул мутахассислар жалб этилган ҳолда кўриб чиқилиши ва 1,5—2 ой ичида тайёр бўлишини қўшимча қилганди. Тошкент шаҳар ҳокими Жаҳонгир Ортиқхўжаев эса 29 июнь куни журналистлар билан бўлиб ўтган мулоқотда Бош план энг асосий муҳим масала эмаслигини таъкидлади, дея хабар бермоқда «Дарё» мухбири.
«Генплан лозим, деб ўйламайман. Ҳозир ‘Бош режа бўлса, ҳаётимиз эртага ривожланиб қолади’, деган тушунча юрибди. Бош режа ҳар доим ҳам иқтисодий ва сиёсий ёки бошқа ривожланишларга ёрдам беради, деган гап эмас», — деди ҳоким Жаҳонгир Ортиқхўжаев, янги Бош план концепцияси ҳали ҳам тасдиқланмаган шаҳарни стратегик ривожлантиришга қанчалик таъсир кўрсатаётгани ҳақидаги саволга жавоб бераркан.
Изоҳ (0)