28-iyunning e’tiborga molik yangiliklari — “Daryo” dayjestida.
30-iyun — 2-iyul kunlari O‘zbekiston hududiga Erondan Turkmaniston orqali issiq va quruq havo oqimining kirib kelishi kuzatiladi.
Kunduz kunlari havo harorati 40—43 daraja, janubiy cho‘l hududlarda 44—45 darajagacha ko‘tariladi.
***
Andijon viloyati hokimi Shuhrat Abdurahmonov boshchiligida o‘tgan yig‘ilishlardan birida sog‘liqni saqlash tizimi vakili sha’niga “haqoratli” so‘zlar aytildi.
Audioyozuvda Shuhrat Abdurahmonov sog‘liqni saqlash tizimi vakillaridan birini (Tahririyat: “katta ehtimol bilan Sog‘liqni saqlash boshqarmasi boshlig‘i Avazbek Abdurahmonov”) “latta”, “iflos”, “it”, “hezalak” kabi o‘ta qo‘pol va haqoratomuz so‘zlar bilan tahqirlaganini tinglash mumkin.
***
Fransiyaning Renault kompaniyasi O‘zbekistonda KWID modelini ishlab chiqarishni yo‘lga qo‘ymoqchi.
Mazkur masala O‘zbekistonning Fransiyadagi elchixonasida fransuz avtomobilsozlik korporatsiyasi rahbariyati bilan o‘tkazilgan uchrashuvda muhokama qilingan.
Xususan, Renault mashhur KWID modelini ishlab chiqarishga, shuningdek, Markaziy Osiyo mamlakatlari va Afg‘onistonga eksport qilishga tayyor.
***
Toshkentda bir kechada ikkita kafe yonib ketdi.
Birinchi yong‘in soat 20:41 da, Olmazor tumani Qoraqamish-1 ko‘chasida joylashgan “Shabboda” kafesida sodir bo‘lgan.
Ikkinchi yong‘in esa soat 21:25 da Yashnobod tumani S.Mashxadiy ko‘chasidagi “U Arkadiya” kafesida sodir bo‘lgan.
***
O‘zbekistonning tashqi qarzi 20 mlrd dollarga yaqinlashib qoldi.
O‘zbekistonning jami tashqi qarzi 2019-yil boshidan 10,3 foizga yoki 1,8 milliard dollarga oshib, 2019-yil 1-aprel holatiga 19,1 milliard dollarni tashkil qildi.
Izoh (0)