Ўзбекистонда кутилаётган аномал жазирама, Андижон вилоят ҳокимининг ҳақоратлари, Renault компаниясининг Ўзбекистонга қизиқиши ва куннинг бошқа хабарлари

28 июннинг эътиборга молик янгиликлари — «Дарё» дайжестида.

30 июнь — 2 июль кунлари Ўзбекистон ҳудудига Эрондан Туркманистон орқали иссиқ ва қуруқ ҳаво оқимининг кириб келиши кузатилади.

Кундуз кунлари ҳаво ҳарорати 40—43 даража, жанубий чўл ҳудудларда 44—45 даражагача кўтарилади.

***

Андижон вилояти ҳокими Шуҳрат Абдураҳмонов бошчилигида ўтган йиғилишлардан бирида соғлиқни сақлаш тизими вакили шаънига «ҳақоратли» сўзлар айтилди.

Аудиоёзувда Шуҳрат Абдураҳмонов соғлиқни сақлаш тизими вакилларидан бирини (Таҳририят: «катта эҳтимол билан Соғлиқни сақлаш бошқармаси бошлиғи Авазбек Абдураҳмонов») «латта», «ифлос», «ит»,  «ҳезалак» каби ўта қўпол ва ҳақоратомуз сўзлар билан таҳқирлаганини тинглаш мумкин.

***

Франциянинг Renault компанияси Ўзбекистонда КWID моделини ишлаб чиқаришни йўлга қўймоқчи.

Мазкур масала Ўзбекистоннинг Франциядаги элчихонасида француз автомобилсозлик корпорацияси раҳбарияти билан ўтказилган учрашувда муҳокама қилинган.

Хусусан, Renault машҳур КWID моделини ишлаб чиқаришга, шунингдек, Марказий Осиё мамлакатлари ва Афғонистонга экспорт қилишга тайёр.

***

Тошкентда бир кечада иккита кафе ёниб кетди.

Биринчи ёнғин соат 20:41 да, Олмазор тумани Қорақамиш-1 кўчасида жойлашган «Шаббода» кафесида содир бўлган.

Иккинчи ёнғин эса соат 21:25 да Яшнобод тумани С.Машхадий кўчасидаги «У Аркадия» кафесида содир бўлган.

***

Ўзбекистоннинг ташқи қарзи 20 млрд долларга яқинлашиб қолди.

Ўзбекистоннинг жами  ташқи қарзи 2019 йил бошидан 10,3 фоизга ёки 1,8 миллиард долларга ошиб, 2019 йил 1 апрель ҳолатига 19,1 миллиард долларни ташкил қилди.