O‘zbekistonda investorlar o‘zlariga qulay bo‘lgan muhitda, o‘zlari istagan davlat tibbiyot muassasalariga investitsiya kiritish imkoniyatiga ega bo‘ldi, deb xabar bermoqda Sog‘liqni saqlash vazirligining jamoatchilik bilan aloqalar bo‘limi. Xususiy sherikni tanlab olish tender asosida yoki to‘g‘ridan to‘g‘ri muzokaralar o‘tkazish orqali amalga oshiriladi.
“Buning uchun investor SSVning Davlat-xususiy sheriklikni va tibbiy turizmni rivojlantirish bosh boshqarmasi va uning hududiy bo‘limlariga Davlat-xususiy sheriklik loyihasi konsepsiyasini amalga oshirish bo‘yicha o‘z takliflari bilan murojaat qilishi mumkin”, — deydi ushbu bosh boshqarma boshlig‘i Kamolxo‘ja Eshnazarov.
Bitimning amal qilish muddati davlat va xususiy sherik tomonidan belgilanib, bunda u uch yildan kam bo‘lmasligi va 49 yildan oshmasligi lozim. Davlat-xususiy sheriklik loyihalarini amalga oshirishda xususiy sherikka ajratilgan yer uchastkalari, sotib olingan tibbiy va boshqa uskunalar, shuningdek, ular tomonidan qurilgan obyektlar bitimning amal qilish muddati tugagandan so‘ng davlat sherigiga topshiriladi.
Yana bir muhim jihati, ushbu hujjat bevosita sog‘liqni saqlash tizimidagi bo‘sh turgan uchastka va binolardan samarali foydalanish, tibbiy xizmatlar ko‘rsatilishini ta’minlashga yordam beradi.
Ushbu qaror bilan belgilangan mexanizmlarda davlat tibbiyot muassasalarida xususiy tibbiyot muassasalari uchun teng imkoniyatlar berilib, investorlarning davlat tibbiyot muassasalariga kirib, hamkorlikda faoliyat tashkil qilish uchun imkoniyat yaratib beradi.
Izoh (0)