Ўзбекистонда инвесторлар ўзларига қулай бўлган муҳитда, ўзлари истаган давлат тиббиёт муассасаларига инвестиция киритиш имкониятига эга бўлди, деб хабар бермоқда Соғлиқни сақлаш вазирлигининг жамоатчилик билан алоқалар бўлими. Хусусий шерикни танлаб олиш тендер асосида ёки тўғридан тўғри музокаралар ўтказиш орқали амалга оширилади.
«Бунинг учун инвестор ССВнинг Давлат-хусусий шерикликни ва тиббий туризмни ривожлантириш бош бошқармаси ва унинг ҳудудий бўлимларига Давлат-хусусий шериклик лойиҳаси концепциясини амалга ошириш бўйича ўз таклифлари билан мурожаат қилиши мумкин», — дейди ушбу бош бошқарма бошлиғи Камолхўжа Эшназаров.
Битимнинг амал қилиш муддати давлат ва хусусий шерик томонидан белгиланиб, бунда у уч йилдан кам бўлмаслиги ва 49 йилдан ошмаслиги лозим. Давлат-хусусий шериклик лойиҳаларини амалга оширишда хусусий шерикка ажратилган ер участкалари, сотиб олинган тиббий ва бошқа ускуналар, шунингдек, улар томонидан қурилган объектлар битимнинг амал қилиш муддати тугагандан сўнг давлат шеригига топширилади.
Яна бир муҳим жиҳати, ушбу ҳужжат бевосита соғлиқни сақлаш тизимидаги бўш турган участка ва бинолардан самарали фойдаланиш, тиббий хизматлар кўрсатилишини таъминлашга ёрдам беради.
Ушбу қарор билан белгиланган механизмларда давлат тиббиёт муассасаларида хусусий тиббиёт муассасалари учун тенг имкониятлар берилиб, инвесторларнинг давлат тиббиёт муассасаларига кириб, ҳамкорликда фаолият ташкил қилиш учун имконият яратиб беради.
Изоҳ (0)