Shu yilning 9-iyun kuni Surxondaryo viloyati Uzun tumani “Chaqar” mahallasida yashovchi, fuqaro Xasanova Munavvarani mahalladoshlari, ya’ni, shu mahallada yashovchi fuqarolar Q.S. va Yu.J.lar urib tan jarohati yetkazganligi haqida Uzun tumani Ichki ishlar bo‘limi Navbatchilik qismiga Uzun tumani tibbiyot birlashmasining tibbiyot xabarnomasi kelib tushgan. Mazkur xabarnoma shu kunning o‘zida ro‘yxatga olingan. Bu haqda Ichki ishlar vazirligi Jamoatchilik va ommaviy axborot vositalari bilan aloqalar boshqarmasi xabar berdi.
Holat yuzasidan olib borilgan tergovga qadar tekshiruv harakatlariga ko‘ra, joriy yilning 8-iyun kuni soat 21:30 larda Uzun tumani “Chaqar” mahallasida yashovchi, fuqaro Yu.J. va Q.S.lar spirtli ichimlik iste’mol qilish maqsadida, shu mahallada istiqomat qiluvchi fuqaro Xasanova Munavvaraning yashash uyiga borgan. Uning yashash uyi oldida joylashgan, faoliyati 2018-yil dekabr oyidan buyon to‘xtatilgan oziq-ovqat do‘koni yopiq ekanligini ko‘ra bila turib, spirtli ichimlik sotishini so‘rab, uning o‘g‘li bilan tortishib turganligini eshitib, Xasanova Munavvara uyidan chiqib kelgan. M.Xasanova fuqarolar Yu.J. va Q.S.larga do‘kon yopiq ekanligini tushuntirib, ketishlarini so‘raganida, fuqaro Yu.J. M.Xasanovaning yuziga bir marotaba qo‘li bilan musht tushirib, unga tan jarohati yetkazganligi aniqlangan.
Hozirda fuqaro M.Xasanovaga nisbatan sud-tibbiy ekspertizasi tayinlangan bo‘lib, tergovga qadar tekshiruv ishlari olib borilmoqda. Tekshiruv natijalari yuzasidan qo‘shimcha xabar beriladi.
Izoh (0)