Zarnews nashrida Gulchehra Berdiyorovaning plastik kartalardagi pulni naqdlashtirib beruvchi bankomatlar ishida nosozliklar kuzatilayotgani haqidagi maqolasi e’lon qilindi. Quyida ushbu maqola to‘lig‘icha keltirilgan.
Yaqinda internetda ko‘zim tushdi —bankomatlar naqd pullardan urib qolayotganmish! Shunaqasi ham bo‘larkanmi, ular avtomatlashtirilgan mashina-ku, odam bo‘lsa ekan, nima qilib bo‘lsa-da yo‘lini topsa, deb hayron bo‘ldim! Negaki, maosh qo‘lga tekkach, uning ma’lum qismini, albatta, naqdlashtirib olishga harakat qilamiz. O‘zimiz vaqt topmasak, biror tanishimiz yo hamkasbimizdan iltimos qilamiz, yo‘l-yo‘lakay plastik kartangizdan pul yechib kelib beradi.
Bu xabarni darhol hamma tanish-bilishlarga yo‘lladim. Yaqinlarimning peshona terisiga kuyib qolishlarini istamadim-da! Ma’lumotlarda bankomatlardan pul yechgach, uni, albatta, sanab olishni tavsiya qilishgandi. Asosan, kattaroq summalardan pullar kam chiqayotganmish. Yerdan topib olsang ham sanab ol, deyishadi-ku! Ogoh bo‘lgan yaxshida!
“Tinib-tinchimagan odamlar-yey, nimalarni o‘ylab topishmaydi-ya!” Ko‘ngilga har xil gap-so‘zlar keladi, desangiz! Avtomat buzuq bo‘lsa, umuman pul chiqarmasligi kerak. U kompyuterlashtirilgan bo‘lsa... Nega urib qoladi? Unda odamlarning avtomat mashinalarga ham ishonchi qolmaydi-ku, buyog‘i qanday bo‘larkin?
Do‘konlarda plastik kartadan ba’zan bitta nolni ko‘p yozib, 10 ming so‘m o‘rniga 100 ming, 5 ming o‘rniga 50 ming adashib urib yuborishadi-ku, bu ham shunday holatdir. Odamlar o‘zlari xato qilishayotgandir, deb o‘ylab qoldim! Bunday emas ekan!
Mutaxassislar buning sababini topishibdi. Ma’lum bo‘lishicha, bankomatning kupyuralar solinadigan kassetalari o‘rni almashib qolganmish. Qarang-a! Muhimi, uni kimdir almashtirib qo‘yganmi, o‘zi ham almashib qolishi mumkinmi—bu haqda ma’lumot yo‘q!
Shahrimizning qayerida bankomat qo‘yilgan bo‘lsa, hamisha odamlar bilan gavjum bo‘lishiga e’tibor bergandirsiz! Demak, u yerga tez–tez ishimiz tushadi. Hozir ham o‘sha yoqqa bormoqchiman. Naqd pul zarur. Bolalarim oromgohga ketyapti. Pullarni esa, albatta, bittalab sanab olaman!
Izoh (0)