Normativ-huquqiy hujjatlar loyihalari muhokamasi portalida Vazirlar Mahkamasining “Ichki ishlar organlarining kinologiya xizmatlari faoliyatini tubdan takomillashtirish chora-tadbirlari to‘g‘risida”gi qarori loyihasi joylashtirildi, deb xabar berdi O‘zA.
Hujjat bilan O‘zbekiston Respublikasi Ichki ishlar vazirligining quyidagi takliflari qabul qilinishi mumkin:
• O‘zbekiston Respublikasi Ichki ishlar vazirligining Transportda xavfsizlikni ta’minlash bosh boshqarmasi hamda Toshkent shahar Ichki ishlar bosh boshqarmasi kinologiya bo‘linmalarining belgilangan shtatlari doirasida Ichki ishlar organlarining xizmat itlari naslchilik pitomnigini;
• Qoraqalpog‘iston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari, viloyatlar ichki ishlar boshqarmalarining xizmat itlari pitomniklari va tuman (shahar) ichki ishlar organlari kinologiya bo‘linmalarining belgilangan shtatlari doirasida tumanlararo kinologiya bo‘linmalarini tashkil etish.
Belgilanishicha:
• naslchilik pitomnigi O‘zbekiston Respublikasi Ichki ishlar vazirligi Patrul-post xizmati va jamoat tartibini saqlash bosh boshqarmasiga bevosita bo‘ysunadi va o‘z vakolati doirasida respublika ichki ishlar organlari ehtiyojlari uchun yaroqli bo‘lgan zotdor xizmat itlarini sotib olish, ko‘paytirish, yetishtirish va yosh itlarini boshlang‘ich ko‘nikmalarni shakllantiruvchi ixtisoslashtirilgan bo‘linma hisoblanadi;
• kinologiya xizmatlari Qoraqalpog‘iston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari, viloyatlar ichki ishlar boshqarmalari Patrul-post xizmati va jamoat tartibini saqlash boshqarmalariga bevosita bo‘ysunadi hamda hududiy ichki ishlar organlariga jamoat tartibini saqlash, huquqbuzarliklar profilaktikasi va jinoyatchilikka qarshi kurashda ko‘maklashadi.
Quyidagilar:
a) naslchilik pitomnigining asosiy vazifalari etib belgilanadi:
• nasldor itlarni tanlash, baholash, juftliklarni to‘g‘ri saralash hamda o‘z vaqtida urchitish ishlarini olib borish;
• ichki ishlar organlari uchun xizmat sifatlari yuqori bo‘lgan hamda zot standart talablariga javob beradigan kuchuk bolalarini yetishtirish, ularni o‘stirish va kinolog xodimlarga biriktirilishiga qadar parvarishlash;
• zotdor itlarni ko‘paytirish va saralash, shuningdek ularning ish sifatini yaxshilashda mahalliy iqlimga moslashishlari va turli xildagi kasalliklarga bardoshligini oshirishda ilmiy va amaliy faoliyatini amalga oshirish;
• xizmat itlarining sifatini, zotini va mahalliy iqlim sharoitiga moslashishini yaxshilash maqsadida nasl olish ishlarining zamonaviy usullarini tatbiq etish;
• manfaatdor vazirlik va idoralar, oliy ta’lim muassasalari, shuningdek jamoatchilik tashkilotlari bilan zotdor itlar sonini oshirish masalalarida hamkorlik qilish;b) kinologiya xizmatlari faoliyatining asosiy yo‘nalishlari etib belgilanadi:
• og‘ir va o‘ta og‘ir hamda shaxsga qarshi jinoyatlarni fosh etishda maxsus yo‘nalishlar bo‘yicha tayyorlangan xizmat itlari imkoniyatlaridan samarali foydalanish;
• jamoat tartibini saqlash, fuqarolar xavfsizligini ta’minlash, giyohvandlik vositalari, portlovchi moddalar, qurol va o‘q-dorilarni aniqlashda ishtirok etish;
• ko‘chalar, maydonlar, istirohat bog‘lari, vokzallar, aeroportlar va boshqa jamoat joylarida, shuningdek ommaviy tadbirlarni o‘tkazish chog‘ida jamoat tartibini saqlash, sodir etilishi mumkin bo‘lgan huquqbuzarliklarning oldini olishda qatnashish.
Belgilab qo‘yilishicha:
• Qoraqalpog‘iston Respublikasi ichki ishlar vazirligi, Toshkent shahar va Toshkent viloyati Ichki ishlar bosh boshqarmalari, viloyatlar ichki ishlar boshqarmalari Patrul-post xizmati va jamoat tartibini saqlash boshqarmalarining Kinologiya xizmatlari faoliyatini muvofiqlashtirish bo‘limlari boshliqlari O‘zbekiston Respublikasi Ichki ishlar vazirligi Patrul-post xizmati va jamoat tartibini saqlash bosh boshqarmasi bilan kelishilgan holda tegishincha Qoraqalpog‘iston Respublikasi Ichki ishlar vaziri, Toshkent shahar va Toshkent viloyati Ichki ishlar bosh boshqarmalari, viloyatlar ichki ishlar boshqarmalari boshliqlari tomonidan lavozimga tayinlanadi va lavozimdan ozod etiladi;
• kinologiya bo‘linmalari xodimlari Qoraqalpog‘iston Respublikasi ichki ishlar vazirligi, Toshkent shahar va Toshkent viloyati Ichki ishlar bosh boshqarmalari, viloyatlar ichki ishlar boshqarmalarining Patrul-post xizmati va jamoat tartibini saqlash boshqarmalari boshliqlarining taqdimnomasiga ko‘ra Qoraqalpog‘iston Respublikasi Ichki ishlar vaziri, Toshkent shahar va Toshkent viloyati Ichki ishlar bosh boshqarmalari, viloyatlar ichki ishlar boshqarmalari boshliqlari tomonidan lavozimga tayinlanadi va lavozimdan ozod etiladi;
• kinologiya bo‘linmalarida xizmat o‘tash uchun ko‘rilayotgan nomzodlar ushbu xizmatlarda bir oylik sinov muddatidan o‘tkaziladi va mazkur xizmat boshliqlarining xulosalari asosida lavozimga tayinlanadi;
• kinologiya bo‘linmalarida mavjud bo‘lgan bo‘sh lavozimlarga tayinlanayotgan va yangidan ishga qabul qilinayotgan xodimlar o‘z lavozimlarida kamida besh yil xizmat o‘tashlari ta’minlanadi;
• sodir etilgan og‘ir va o‘ta og‘ir turdagi hamda shaxsga qarshi jinoyatlarning voqea joyini dastlabki ko‘zdan kechirish kinolog xodim tomonidan xizmat iti yordamida majburiy tartibda amalga oshiriladi;
• o‘rnatilgan tartibda xizmatga yaroqsiz deb topilgan xizmat itlari kinolog xodimlarning istagiga ko‘ra ularga beg‘araz tarzda beriladi;
• har bir og‘ir va o‘ta og‘ir turdagi, shuningdek shaxsga qarshi jinoyatlarni bevosita xizmat itlari yordamida fosh etgan kinologiya xizmatlari xodimlari byudjetdan tashqari mablag‘lar hisobidan eng kam oylik ish haqining besh baravarigacha miqdoridagi pul mukofoti bilan taqdirlanadi;
• kinologiya xizmatlari xodimlariga xizmatdan tashqari paytlarda xizmat itlarini yashash manzillarida saqlashga ruxsat beriladi;
• kinologiya xizmatlari xodimlari uchun har yili O‘zbekiston Respublikasi Ichki ishlar vazirligi Akademiyasida sirtqi ta’lim olishga qabul qilinadigan xodimlar (harbiy xizmatchilar) umumiy sonining bir foizi miqdorida qabul kvotasi ajratiladi.
O‘zbekiston Respublikasi Ichki ishlar vazirligining huquqbuzarliklar profilaktikasi va jinoyatchilikka qarshi kurashda, innovatsion g‘oyalar asosida tizimda yangilik yaratish va sohani takomillashtirishda munosib hissa qo‘shgan, xizmat faoliyatida yuqori natijalarga erishgan kinologiya xizmati xodimlarini taqdirlash maqsadida quyidagi idoraviy ko‘krak nishonlari ta’sis etish haqidagi taklifi ma’qullanishi mumkin:
I. “3-toifali kinolog xodim”;II. “2-toifali kinolog xodim”;III. “1-toifali kinolog xodim”.
Izoh (0)