Joriy yilning 25-aprel kunida “Sharaf lentasi”ni tarqatish aksiyasiga start berildi. Shu bois Toshkent shahrining Xalqlar do‘stligi majmuasi maydonida O‘zbekiston Milliy gvardiyasi Harbiy-texnik instituti kursantlari hamda O‘zbekiston yoshlar ittifoqining faol va ko‘ngilli yoshlari ishtirokida milliy bayroq ramzi tushirilgan “Sharaf lentasi”ni aholiga tarqatish tadbiri bo‘lib o‘tdi. Bu haqda Milliy gvardiya matbuot xizmati “Daryo”ga xabar berdi.
Bekatga kelib to‘xtagan jamoat transportlari hamda avtoulovlarga Xotira va qadrlash kuniga bag‘ishlangan maxsus stikerlar yopishtirildi, yo‘lovchilar va yig‘ilganlarga esa “Sharaf lentasi” taqdim etildi.
Bundan ko‘zlangan maqsad Ikkinchi jahon urushida halok bo‘gan ajdodlar xotirasini yod etish, shuningdek, yoshlarning ma’naviy tarbiyasiga inson qadri uning xotirasini sharaflash bilan ulug‘ ekanligini singdirishdir.
Ana shunday maqsadlar bilan bo‘lib o‘tayotgan aksiyani ko‘zida yosh bilan kuzatib o‘tirgan keksa onaxonlardan biri tadbir haqida iliq fikrlarni bildirdi: “Ko‘nglimiz shod, juda ham chiroyli bayram bo‘lyapti. Tarqatilayotgan lenta va stikerlardan nevaralarimga ham oldim, ularga Ikkinchi jahon urushi tarixi va bugungi kunda erishilgan tinchlik haqida so‘zlab beraman. Yurtimizga tinchlik, xalqimizga omonlik tilayman, farzandlarimiz aslo urush ko‘rmasin”.
O‘zbekiston Milliy gvardiyasi harbiy orkestri tomonidan ijro etilgan musiqiy chiqishlar hamda el ardog‘idagi san’atkorlarning tashrif buyurgani aksiya ishtirokchilari va aholiga yuqori kayfiyat ulashdi.
Izoh (0)