Жорий йилнинг 25 апрель кунида «Шараф лентаси»ни тарқатиш акциясига старт берилди. Шу боис Тошкент шаҳрининг Халқлар дўстлиги мажмуаси майдонида Ўзбекистон Миллий гвардияси Ҳарбий-техник институти курсантлари ҳамда Ўзбекистон ёшлар иттифоқининг фаол ва кўнгилли ёшлари иштирокида миллий байроқ рамзи туширилган «Шараф лентаси»ни аҳолига тарқатиш тадбири бўлиб ўтди. Бу ҳақда Миллий гвардия матбуот хизмати «Дарё»га хабар берди.
Бекатга келиб тўхтаган жамоат транспортлари ҳамда автоуловларга Хотира ва қадрлаш кунига бағишланган махсус стикерлар ёпиштирилди, йўловчилар ва йиғилганларга эса «Шараф лентаси» тақдим этилди.
Бундан кўзланган мақсад Иккинчи жаҳон урушида ҳалок бўган аждодлар хотирасини ёд этиш, шунингдек, ёшларнинг маънавий тарбиясига инсон қадри унинг хотирасини шарафлаш билан улуғ эканлигини сингдиришдир.
Ана шундай мақсадлар билан бўлиб ўтаётган акцияни кўзида ёш билан кузатиб ўтирган кекса онахонлардан бири тадбир ҳақида илиқ фикрларни билдирди: «Кўнглимиз шод, жуда ҳам чиройли байрам бўляпти. Тарқатилаётган лента ва стикерлардан невараларимга ҳам олдим, уларга Иккинчи жаҳон уруши тарихи ва бугунги кунда эришилган тинчлик ҳақида сўзлаб бераман. Юртимизга тинчлик, халқимизга омонлик тилайман, фарзандларимиз асло уруш кўрмасин».
Ўзбекистон Миллий гвардияси ҳарбий оркестри томонидан ижро этилган мусиқий чиқишлар ҳамда эл ардоғидаги санъаткорларнинг ташриф буюргани акция иштирокчилари ва аҳолига юқори кайфият улашди.
Изоҳ (0)