Toshkent shahar hokimligi matbuot xizmati so‘nggi paytlarda ayrim OAVlarda chop etilayotgan axborot xurujlariga munosabat bildirdi. Quyida hokimiyat munosabati e’tiboringizga havola etiladi.
Biznes asosan maqsadli kelishuvlardan iborat. Agar loyiha ijtimoiy, iqtisodiy ahamiyatga ega bo‘lsa, uni tasdiqlash va amalga oshirishda muammo yo‘q. Ammo bu masalada ko‘zbo‘yamachilikka o‘tgan tadbirkorlar bilan bitim tuzib bo‘lmaydi. Shaxsiy manfaatdan boshqa biror nafi bo‘lmagan ayyor ishbilarmonlar endi axborot hujumiga o‘tishmoqda.
Mahalliy hokimiyat vakillarini biznes yuritishinga to‘sqinlik qilayotganligi haqidagi ayblov bilan chiqdingmi,- demak sen qahramonsan. Baxtinga hech qanday faktlari va isbotlari bo‘lmagan shov-shuvli material e’lon qilib, jamoatchilik e’tiborini tortishga o‘ylaydigan OAV ham ko‘p.
Bugun biznesda omadi yurishmayotgan tadbirkor xuddi shunday da’vo bilan mahalliy hokimiyat idoralarining nomini qora qilmoqda. Uning Toshkent shahar hokimi, O‘zbekiston Respublikasi bosh vaziri hamda tuman hokimligi mutasaddilari va boshqalarga nisbatan ayblovlari OAV e’lon qilib borilmoqda. Haqiqat esa shundaki, mas’ul hay’at uning qurilish me’yorlariga tamoman zid bo‘lgan ko‘p qavatli uylarini talabga javob bermagani uchun qabul qilmagan.
Uylari sifat talablariga javob bera olmasligini bila turib ham quruvchi komissiya ularni e’tirozsiz qabul qiladi deb ishongani g‘alati. Balki u yer olish, uy qurish va topshirishgacha bo‘lgan barcha jarayonlarda mutasaddilarga pora berib, ishimni bitirib ketaman deb o‘ylagandir. Endi esa tadbirkor amalga oshmagan xom xayollari girdobidan chiqib keta olmayapti. Sifatsiz uylarini qay yo‘l bilan bo‘lsa ham foydalanishga topshirish harakatini qilayapti. Tadbirkor tomonidan bugungacha foydalanishga topshirilgan uylarning me’moriy yechimi, qurilish me’yorlari va sifati qanchalik talabga javob berishi, ularda istiqomat qilayotgan aholining o‘z uylaridan qanchalik mamnunligiyu sifatsiz turar joylarni qurish va foydalanishga yo‘l qo‘ygan mas’ul kishilarning ishi masalasi hozirda Toshkent shahar hokimligining tegishli komissiya tomonidan atroflicha o‘rganilmoqda. Xulosalar asosida aybdorlar tegishli tartibda javobgarlikka ham tortiladi.
Tadbirkor hozirda OAVlarida turli da’voyu ayblovlar bilan chiqib, masalaning asl mohiyatidan e’tiborni chalg‘itmoqchi bo‘layotganligini qo‘rqoq oldi musht ko‘tarar deya izohlasak xato bo‘lmas. “Mutasaddi rahbarlarning og‘zaki buyrug‘i bilan men qurayotgan ko‘p qavatli uylar buzib tashlandi” – deya jar solayotgan Muhammadbobur Xo‘jayevdan boshqa biror kimsa u aytganidek, rahbarlarning topshirig‘idan xabardor emas.
Tadbirkorning da’volari nechog‘li haqqoniy ekani va u tomonidan qurilgan uylarning holati qanday ekanligini xolis o‘rganish uchun Toshkent shahar hokimligi matbuot xizmati xodimlarini ham bu ishga jalb etdi. Ular Muhammadbobur Xo‘jayev tomonidan qurib, foydalanishga topshirilgan ko‘p qavatli turar joylarda bo‘lib, u yerda istiqomat qilayotgan aholi bilan suhbatlashishdi.
Mustahkam poydevorsiz uy qurish mumkinmi degan savolning javobini nafaqat quruvchilar, balki oddiy aholi ham biladi. Shu ma’noda jurnalistlar uylar holatini o‘rganar ekanlar, nahotki Toshkentda shunday xaroba uylar ham bo‘lsa, deya hayratlandilar.
Uylarda yong‘in xavfsizligi me’yorlariga umuman rioya etilmagan, yomg‘ir suvi ketadigan arig‘u quduqlar ham yo‘q. Uylarda devorning o‘rniga gipskartondan foydalanilganiga nima deysiz. Xullas, muammolarning keti uzilmaydi. Hatto bu uylarning polidan o‘tlar o‘sib chiqqan holatlar ham kuzatilgan.
Devorning ham qulog‘i bor degan, naql bejiz keltirilmaydi. Matbuot xizmati xodimlarining uylar holatini o‘rganayotganligidan xabar topgan quruvchi Ravshan Zokirov darhol o‘zining superuylariga yetib kelib, muloqotga aralashdiyu odamlarni deyarli gapirtirmay qo‘ydi. Jurnalistlar odamlar fikrini o‘rganayotgani uni nihoyatda tashvishga soldi. Agar quruvchi o‘z uylarining sifati va bugungi kundagi holatidan ko‘ngli to‘q bo‘lganida xavotirga o‘rin yo‘q edi. Demak, noroziliklar ko‘p va ular jamoatchilikka e’lon qilinmasligidan Ravshan Zokirov manfaatdor.
Negaki, u ushbu uylarga mas’ul shaxs hisoblanadi, va turar joyda yuzaga kelayotgan muammolar ham uning ishtiroki bilan xal bo‘ladi. Uning bevosta rahbari bo‘lgan Muhammadbobur Xo‘jayev o‘ziga nisbatan katta ishonch bilan hokimlik vakillarini ayblayotgan bir paytda nega unda o‘z uylarining sifatli ekaniga ishonch yo‘q.
Axir kun qahramoniga aylangan Muhammadbobur Xo‘jayev 4-aprel kuni ham bir nechta OAVlarda o‘zini ko‘rsatdi. “S-1”da “Toshkentlik tadbirkor OAVlaridagi (namoyishkorona)chiqishlaridan so‘ng axborotdan xujumiga tayyorlanmoqda” sarlavhali hikoya e’lon qilindi va unda go‘yoki hokimiyat qiynayotgan tadbirkorning “qalb hayqiriqlari” bayon etildi.
O‘zini haqiqat va adolat tarafdori deya bong urayotgan tadbirkor Muhammadbobur Xo‘jayev Mirzo Ulug‘bek tumani hokimligi tadbirkorga qarshi fakt va dalillar to‘plab, sud qarori asosida u qurgan uylarni buzishga haqarat qilayotganligini ma’lum qilgan.
Shuningdek, tadbirkor yangi chiqishida u tomonidan 2017 va 2018 yillarda qurilgan uylarda jurnalistlar ishtirokida aholi fikri o‘rganilib, tasvirga olish ishlari bo‘lib o‘tgani haqida ham to‘xtalgan. Va bu ijodiy guruhni noxoislik hamda yolg‘onchilikda ayblagan.
Endi esa noxolis ijodkorlarga to‘xtalsak. Maqolani o‘qiyotgan kishi matbuot xizmati vakillari bilan quruvchi Ravshan Zokirov muloqot qilganidan xabardor. Bu ijodkorlar qo‘lidagi tasvirlarga ham muhrlangan. Ammo Muhammadbobur Xo‘jayev masalaga faqat u xohlaganidek yondoshuv to‘g‘ri deb hisoblamoqda. Xususan, u voqea joyida shaxsan o‘zi bo‘lgani va ijodiy guruhdan nega tasvirga olish ishlarini amalga oshirayotganliklarini so‘raganligini, ular esa tadbirkor uylarni noto‘g‘ri qurayotgani haqida material tayyorlashayotganligini aytishganligini bayon qilgan. Ha, odamlar qanday qilib “hokimiyat qiynayotgan tadbirkor”ga ishonishmasin. Axir ularda asl voqelikning tasviri yo‘q va ularning har biri bu masalaning mohiyatini chuqur o‘rganmaydiku. Shu bois ham u atrofdagilarning nazarida aybdor va yolg‘onchi emas, balki jabrdiydadir.
Uning ayblovlari shunchalik asossiz ekanidan tadbirkorda vijdon bormi deb o‘ylab qolasiz. Go‘yoki, ijodiy guruh u qurdirgan uylarga hokmiyat va mahalla fuqarolar yig‘ini mas’ullaridan iborat kishilardan odam yollab oborib, tuhmat fikrlarni yozib olgan. Lekin videokamera qayd etilgan uylar, xonadonlar raqamlari, yashovchilarning ismi sharifi va fikrlarini ko‘rib, tinglagan odam, o‘zi ham shaxsan Muhammadbobur Xo‘jayev qurgan uylarga borib kim haqu kim nohaq ekanligiga aniqlik kiritishi mumkin.
Tadbirkor quruvchisi Ravshan Zokirov haqida biror so‘z aytmay, nega o‘zi shaxsan ijodiy guruh bilan muloqot qilganini bildirayotgani shubhali emas. Adolat va haqiqat uchun kurashayotgan tadbirkor sifatsiz uylarni odamlarga yashash uchun qo‘rqmagani, hayiqmaganidek, yolg‘oni fosh bo‘lishiga ham e’tiborsiz.
Tadbirkor Muhammadbobur Xo‘jayev boshlagan axborot xujumi odamlarni sifatsiz uylarning qurilishi bilan bog‘liq bo‘lgan masalaning asl mohiyatidan chalg‘itishi mumkin. Chalg‘itadi, ammo muammoni xal etmaydi. Negaki, bunday uylarda yashayotgan odamlar o‘z muammosini yashirib o‘tirishmaydi. Demak, xujumni hokimiyatga emas, noto‘g‘ri qilingan va qilinayotgan ishlarga qarshi yo‘naltirish to‘g‘ri bo‘lardi. Negaki, oyni etak bilan yopib bo‘lmaganidek, xato va kamchiliklar qanchalik berkitilmasin, yolg‘onu bo‘htonlar nechog‘li avj olmasin, haqiqat qaror topadi.
Qurilishda yo‘l qo‘yilgan jiddiy xatolarni bino bitganidan so‘ng to‘g‘irlab bo‘lmaydi. Bundan jabr ko‘rayotgan odamlarni ham ovutish mushkul. Ular xususiy mulk egasi sifatida sotib olgan uylarining kam-ko‘sti bartaraf bo‘lishini talab qilaverishadi. Bu masalada sudga murojaat qilishlarini ham inkor etib bo‘lmaydi. Bu yerda esa axborot xujumlari, o‘yinlari yordam bera olmaydi. Hokimni songina aybdor qilishda qo‘llanilgan siyosat bu yerda o‘tmaydi.
Izoh (0)