Navoiy viloyatining Nurota tumanida ichimlik suvi bilan bog‘liq bo‘lgan muammolar hal etiladi. Bu haqda O‘zbekiston Prezidenti maslahatchisi o‘rinbosari Alisher Usmonov va Navoiy viloyat IIB mutasaddilari bilan Nurota tumanida bo‘lib o‘tgan sayyor yig‘ilishlarda aytib o‘tildi.
Navoiy viloyati IIB matbuot xizmatining “Daryo”ga ma’lum qilishicha, viloyat markazidan 240 km uzoqlikda joylashgan Nurota tumanining “Temirqovuq” mahalla fuqarolar yig‘inida Temirqovuq, Chuqurquduq, Cho‘pon ovul, Qo‘ziboy quduq qishloqlari hamda Sentop va Kattasoy mahalla fuqarolar yig‘ini aholisi bilan sayyor uchrashuvlar tashkil etildi. Uchrashuvlarda 300 dan ortiq fuqaro ishtirok etdi. Yig‘ilgan fuqarolarning 74 nafaridan 91 ta murojaat kelib tushdi.
— Bizda suv ta’minotida qiyinchiliklar bo‘lgani uchun dehqonchilik qilishda qiynalamiz. Qurbi yetganlar artizan bilan suv chiqarishmoqda, — deydi fuqaro O‘ral Usmonov.
Tadbir davomida kredit evaziga har bir xonadonga artizan quduq qazib berib, suv chiqarish bo‘yicha aniq chora-tadbirlar belgilandi. Shuningdek, mutasaddilar aholining uy-joy bilan ta’minlash, turar joyni kadastr qilish, iste’mol krediti olish, ishsizlik, sog‘liqni saqlash, ichki yo‘llarni ta’mirlash, eskirib ketgan sim yog‘ochlarni yangilariga almashtirish masalalari bo‘yicha ham bildirgan shikoyatlarini tinglab, o‘z joyida murojaatlarning 30 foizini qanoatlantirdi.
— Bugun hududdagi 40 kilometrlik ichki yo‘llarni ta’mirlash, mavjud MTMlarni rekonstruksiya qilish, yangilarini qurish masalalarini 2019—2020-yillarga mo‘ljallangan davlat dasturiga kiritish belgilandi, — deydi viloyat IIB boshlig‘i Rustam Tursunov. — Biz viloyat IIB sektoriga qarashli bo‘lgan mazkur hududlarda shu kunga qadar ham bir necha bor sayyor uchrashuvlar tashkil etgan edik. Ammo bugun aholi qamrovi va muammolarni hal etish imkoniyatlar yanada kengaydi.
O‘zbekiston Respublikasi Prezidenti joriy yilning 12-mart sanasida Nurota tumaniga tashrifi chog‘ida tumanni ijtimoiy iqtisodiy rivojlantirish uchun 63 milliard so‘m mablag‘ ajratilgani haqida ma’lumot bergan edi. Uchrashuvlar davomida hududdagi ishsizlik masalasi mazkur mablag‘lardan aholiga 8%li bank kreditlari ajratish orqali hal etilishi ham aytib o‘tildi.
Izoh (0)