Нуротадаги ичимлик суви муаммоси ҳар бир хонадонда артизан қудуқ қазиш орқали ҳал этилади

Навоий вилоятининг Нурота туманида ичимлик суви билан боғлиқ бўлган муаммолар ҳал этилади. Бу ҳақда Ўзбекистон Президенти маслаҳатчиси ўринбосари Алишер Усмонов ва Навоий вилоят ИИБ мутасаддилари билан Нурота туманида бўлиб ўтган сайёр йиғилишларда айтиб ўтилди.

Навоий вилояти ИИБ матбуот хизматининг «Дарё»га маълум қилишича, вилоят марказидан 240 км узоқликда жойлашган Нурота туманининг «Темирқовуқ» маҳалла фуқаролар йиғинида Темирқовуқ, Чуқурқудуқ, Чўпон овул, Қўзибой қудуқ қишлоқлари ҳамда Сентоп ва Каттасой маҳалла фуқаролар йиғини аҳолиси билан сайёр учрашувлар ташкил этилди. Учрашувларда 300 дан ортиқ фуқаро иштирок этди. Йиғилган фуқароларнинг 74 нафаридан 91 та мурожаат келиб тушди.

— Бизда сув таъминотида қийинчиликлар бўлгани учун деҳқончилик қилишда қийналамиз. Қурби етганлар артизан билан сув чиқаришмоқда, — дейди фуқаро Ўрал Усмонов.

Тадбир давомида кредит эвазига ҳар бир хонадонга артизан қудуқ қазиб бериб, сув чиқариш бўйича аниқ чора-тадбирлар белгиланди. Шунингдек, мутасаддилар аҳолининг уй-жой билан таъминлаш, турар жойни кадастр қилиш, истеъмол кредити олиш, ишсизлик, соғлиқни сақлаш, ички йўлларни таъмирлаш, эскириб кетган сим ёғочларни янгиларига алмаштириш масалалари бўйича ҳам билдирган шикоятларини тинглаб, ўз жойида мурожаатларнинг 30 фоизини қаноатлантирди.

— Бугун ҳудуддаги 40 километрлик ички йўлларни таъмирлаш, мавжуд MTMларни реконструкция қилиш, янгиларини қуриш масалаларини 2019—2020 йилларга мўлжалланган давлат дастурига киритиш белгиланди, — дейди вилоят ИИБ бошлиғи Рустам Турсунов. — Биз вилоят ИИБ секторига қарашли бўлган мазкур ҳудудларда шу кунга қадар ҳам бир неча бор сайёр учрашувлар ташкил этган эдик. Аммо бугун аҳоли қамрови ва муаммоларни ҳал этиш имкониятлар янада кенгайди.

Ўзбекистон Республикаси Президенти жорий йилнинг 12 март санасида Нурота туманига ташрифи чоғида туманни ижтимоий иқтисодий ривожлантириш учун 63 миллиард сўм маблағ ажратилгани ҳақида маълумот берган эди. Учрашувлар давомида ҳудуддаги ишсизлик масаласи мазкур маблағлардан аҳолига 8%ли банк кредитлари ажратиш орқали ҳал этилиши ҳам айтиб ўтилди.