Surxondaryo viloyatida voyaga yetmaganlar va yoshlar o‘rtasida huquqbuzarlik va jinoyatchilikning oldini olish borasida olib borilayotgan profilaktik tadbirlarga qaramasdan, ayrim voyaga yetmaganlar ular tomonidan turli jinoyatlar sodir etish holatlari uchrab turibdi, deb ma’lumot berdi, Jinoyat ishlari bo‘yicha Qiziriq tuman sudining raisi B.Mamadaminov. Bu haqda O‘zA xabarida aytiladi.
Foto: O‘zA
Qayd etilishicha, Qiziriq tumanida yashovchi J.Salohiddinov, I.Jo‘rayev va E.Abdurahmonovlar 2018-yil 25-noyabr kuni soat 02:00 larda Qiziriq tumani, “Rabatak” mahalla hududidagi M.Hasanovga tegishli bo‘lgan “Kelajak Parvozi” savdo do‘koniga kelib, atrofda hech kim yo‘qligidan foydalanib, do‘kon eshigini kalit tanlash yo‘li bilan ochib, jami 23 550 000 so‘mlik tovar moddiy boyliklarini yashirin ravishda talon-toroj qilib, voqea joyidan yashiringan.
Olib borilgan tezkor surishtiruv harakatlari davomida E.Abdurahmonov, J.Salohiddinov hamda I.Jo‘rayevdan 6 dona LED 32/9000 modelli Artel rusumli televizorlar, 3 dona 32 AN 90 G SMART modelli televizorlar, 2 dona Lenovo rusumli noutbuk kompyuterlar, 2 do‘kon eshigining kalitlari va 2 604 000 so‘m ashyoviy dalil sifatida olingan.
Jinoyat ishlari bo‘yicha Qiziriq tuman sudining Qiziriq tuman ichki ishlar bo‘limida bo‘lib o‘tgan ochiq sayyor sud majlisida mazkur jinoyat ishi ko‘rib chiqildi.
Sud, J.Salohiddinov, I.Jo‘rayev va E.Abdurahmonovlarni O‘zbekiston Respublikasi Jinoyat Kodeksining 169-moddasi (O‘g‘rilik) 2-qismi “v”, “g” bandlari bilan aybli deb topdi va O‘zbekiston Yoshlar Ittifoqi Qiziriq tumani Kengashining va keng jamoatchilikning kafilligini e’tiborga olib, ularni O‘zbekiston Respublikasi JKning 70-moddasiga asosan jazodan ozod qildi.
