Belgradda namoyishchilar Serbiya prezidenti Aleksandr Vuchichning qarorgohi atrofini o‘rab olib, uning qarorgoh hududini tark etishiga to‘sqinlik qilmoqda. “TASS” ma’lumotiga ko‘ra, bino yaqinida mingga yaqin odam mavjud, saroy devorlari bo‘ylab maxsus kuchlar askarlari joylashtirilgan.
Aktivistlar prezident Vuchichning iste’fosi haqida shiorlar aytmoqda, uning qarorgoh tashqarisiga chiqib xalqqa murojaat qilishini talab qilmoqda.
“Moskva govorit” radiostansiyasining bildirishicha, saroydagi vaziyat keskinligicha qolmoqda: avtomobil yo‘llari berkitilgan va ko‘cha Wi-Fi tizimi o‘chirilgan.
17-mart, yakshanba kuni avvalroq muxolifat vakillari “Serbiya radio va televideniyesi” (RTS) teleradiokompaniyasi binosini egallab olgandi. Bunga sabab, muxolifat yetakchilari siyosiy shouga taklif qilinmagan edi. Ko‘p o‘tmay namoyishchilar binodan chiqarib yuborildi va efirga uzatish davom ettirildi.
Vuchich voqeani sharhlab, namoyishchilar teleradiokompaniya binosini egallashiga muxolifat yetakchilarining xalq ko‘magini yo‘qotganligi va ilojsizligi sabab bo‘lgan deydi.
Serbiyaning amaldagi prezidenti Aleksandr Vuchichga qarshi norozilik namoyishlari o‘tgan yil dekabr oyidan buyon davom etmoqda.
Izoh (0)