12-mart kuni Toshkent viloyati Nurafshon shahar ma’muriy sudida “Yangiobod” turistik bazasining yeri viloyat hokimligi tomonidan qo‘yilishi yuzasidan sud jarayoni boshlandi. Bu haqda “Gazeta.uz” xabar berdi.
Ma’muriy ish sudya Husan Hamidov tomonidan ko‘rib chiqilmoqda. Turbaza huquqshunosi Azimjon Rahmatov da’vogar sifatida ishtirok etib, Toshkent viloyati hokimi G‘ulomjon Ibragimovning “Yangiobod” turbazasining olib qo‘yilishini ko‘zda tutuvchi 2019-yil 25-yanvardagi qarori to‘liq qonuniy kuchga ega emasligi hamda u turbaza huquq va manfaatlarini buzayotgani tan olinishini talab qilmoqda. Javobgar tomon sudda ishtirok etmagan.
Da’vogarning qayd etishicha, Toshkent viloyati hokimi qarorini qabul qilishda Yer kodeksining 37-moddasi va Vazirlar Mahkamasining 2006-yil 25-maydagi qarori, aniqroq aytganda, davlat va jamoat ehtiyojlari uchun yer uchastkasini olib qo‘yilishida yerdan foydalanuvchi bilan oldindan kelishuvga erishish tartiblari buzilgan.
Bundan tashqari, hokim qarorida yer uchastkasi aynan qaysi maqsadlarda olib qo‘yilayotgani ko‘rsatilmagan.
“Toshkent viloyati hokimi mulkdorlar, shuningdek manfaatdor tashkilotlar va idoralar bilan yer uchastkasini olib qo‘yishni ochiq muhokama qilish bo‘yicha majburiy jarayonlarni inkor qilgan holda yer uchastkasini olib qo‘yish to‘g‘risidagi qarorni qabul qilgan”, — deydi huquqshunos.
“Yangiobod. Chotqol marvaridi” direktori Ali To‘xtayev 7-mart kuni sudga murojaat qilib, viloyat hokimining yerni olib qo‘yish to‘g‘risidagi qarori ijrosini da’vo sudda ko‘rilgunga qadar to‘xtatishni so‘ragan. U hokim qarorida kompaniya foydasiga qayd etilgan majburiyatlar hali bajarilmagani, shu munosabat bilan turbaza manfaatlariga real jiddiy xavflar borligini ko‘rsatib o‘tgan.
Sudya Husan Hamidov kompaniya manfaatlariga real xavflar yo‘q ekanini ta’kidlab, da’voni qanoatlantirmagan.
Navbatdagi sud majlisi 19-mart kuni bo‘lib o‘tadi.
Izoh (0)