12 март куни Тошкент вилояти Нурафшон шаҳар маъмурий судида «Янгиобод» туристик базасининг ери вилоят ҳокимлиги томонидан қўйилиши юзасидан суд жараёни бошланди. Бу ҳақда «Газета.uz» хабар берди.
Маъмурий иш судья Ҳусан Ҳамидов томонидан кўриб чиқилмоқда. Турбаза ҳуқуқшуноси Азимжон Раҳматов даъвогар сифатида иштирок этиб, Тошкент вилояти ҳокими Ғуломжон Ибрагимовнинг «Янгиобод» турбазасининг олиб қўйилишини кўзда тутувчи 2019 йил 25 январдаги қарори тўлиқ қонуний кучга эга эмаслиги ҳамда у турбаза ҳуқуқ ва манфаатларини бузаётгани тан олинишини талаб қилмоқда. Жавобгар томон судда иштирок этмаган.
Даъвогарнинг қайд этишича, Тошкент вилояти ҳокими қарорини қабул қилишда Ер кодексининг 37-моддаси ва Вазирлар Маҳкамасининг 2006 йил 25 майдаги қарори, аниқроқ айтганда, давлат ва жамоат эҳтиёжлари учун ер участкасини олиб қўйилишида ердан фойдаланувчи билан олдиндан келишувга эришиш тартиблари бузилган.
Бундан ташқари, ҳоким қарорида ер участкаси айнан қайси мақсадларда олиб қўйилаётгани кўрсатилмаган.
«Тошкент вилояти ҳокими мулкдорлар, шунингдек манфаатдор ташкилотлар ва идоралар билан ер участкасини олиб қўйишни очиқ муҳокама қилиш бўйича мажбурий жараёнларни инкор қилган ҳолда ер участкасини олиб қўйиш тўғрисидаги қарорни қабул қилган», — дейди ҳуқуқшунос.
«Янгиобод. Чотқол марвариди» директори Али Тўхтаев 7 март куни судга мурожаат қилиб, вилоят ҳокимининг ерни олиб қўйиш тўғрисидаги қарори ижросини даъво судда кўрилгунга қадар тўхтатишни сўраган. У ҳоким қарорида компания фойдасига қайд этилган мажбуриятлар ҳали бажарилмагани, шу муносабат билан турбаза манфаатларига реал жиддий хавфлар борлигини кўрсатиб ўтган.
Судья Ҳусан Ҳамидов компания манфаатларига реал хавфлар йўқ эканини таъкидлаб, даъвони қаноатлантирмаган.
Навбатдаги суд мажлиси 19 март куни бўлиб ўтади.
Изоҳ (0)