O‘zbekistonda hayvonlarga shafqatsiz munosabatda bo‘lganlik uchun javobgarlik kuchaytiriladi

Hayvonlarga shafqatsiz munosabatda bo‘lganlik uchun javobgarlikni kuchaytirishni o‘z ichiga oluvchi qonun loyihasi 5-mart kuni O‘zbekiston Oliy Majlisi Qonunchilik palatasi tomonidan birinchi o‘qishda qabul qilindi. Bu haqda “Mehr va Oqibat” hayvonlarni himoya qilish jamiyati ma’lum qildi, deb yozadi “Gazeta.uz”.

Qonun loyihasi, jumladan, O‘zbekiston MJtKning 111-moddasini yangilashni ko‘zda tutadi. Jumladan, hayvonlarga nisbatan shafqatsiz muomalada bo‘lish, ularning o‘limi yoki mayib bo‘lib qolishiga olib kelgan holatlar EKIHning 10 barobaridan 15 barobarigacha jarima qo‘llash uchun asos bo‘lishi taklif etilmoqda.

Ma’muriy jazo qo‘llanilgandan keyingi bir yil ichida sodir etilgan ayni shu huquqbuzarliklar yoki mazkur moddaning birinchi qismida ko‘zda tutilgan huquqbuzarliklarni sodir etishga voyaga yetmaganlarni jalb etish EKIHning 15 barobaridan 30 barobarigacha jarima qo‘llash yoki 15 sutkagacha ma’muriy qamoq jazosiga sabab bo‘ladi.

Hozirda MJtKning 111-moddasi EKIHning 0,5—2 miqdoridagi jazoni ko‘zda tutadi.