O‘zbekiston Respublikasi Energetika vazirligi va “Buyuk kelajak” XNNT 5-martda o‘zaro anglashuv to‘g‘risidagi memorandumni imzoladi. Bu haqda vazirlik matbuot xizmati xabar berdi.
Hujjat Energetika vaziri Alisher Sultonov va “Buyuk kelajak” XNNT ijrochi direktori Zuhra Azimova tomonidan imzolandi.
Hamkorlik doirasida tomonlar mamlakat energetika sohasini isloh qilish va uni jadal rivojlantirishga ta’sir ko‘rsatishga qodir loyihalarni muhokama qilish va taklif qilish maqsadida qo‘shma ekspert guruhini tashkil etish to‘g‘risida kelishib oldi.
“Buyuk kelajak” XNNT ning asosiy vazifalaridan biri – turli sohalarda salmoqli xorijiy tajriba orttirgan vatandoshlarimizni birlashtirish, amalga oshirilayotgan o‘zgarishlar samaradorligini oshirish, davlat va jamiyatni har tomonlama jadal rivojlantirish uchun O‘zbekiston iqtisodiyoti hamda ijtimoiy sohasining turli sohalarida ekspert yordamini ko‘rsatishdan iborat.
Memorandumga muvofiq, tomonlar ilg‘or xorijiy tajribani hisobga olgan holda O‘zbekiston Respublikasi energetika sektorini yanada jadal rivojlantirish maqsadda hamkorlik qilishni rejalashtirmoqda. Bunga xususan quyidagilar bo‘yicha takliflarni ishlab chiqish kiradi: mamlakat yoqilg‘i-energetika kompleksini rivojlantirish bo‘yicha ustuvor yo‘nalishlarni amalga oshirish; elektr energiya va neft-gaz sohalarini isloh qilish; yuqori darajali sanoat va ekologik xavfsizlikni ta’minlovchi zamonaviy texnologiyalaridan foydalangan holda qayta tiklanadigan energiya manbalarini va infrastrukturani qurish va boshqalar.
Ko‘zda tutilishicha, tomonlar ta’limiy seminarlarni tashkil qilish, muzokaralarni o‘tkazish uchun yetakchi mutaxassislarni jalb qilish, qarorlar qabul qilish va boshqa masalalar bo‘yicha hamkorlik qilishi mumkin.
Ma’lumot uchun,“Buyuk kelajak” XNNT ning asosiy organi vatandoshlarni – xorijda muvaffaqiyatli ish tajribasiga ega mutaxassislarni birlashtiruvchi Ekspertlar kengashidir. Kengash xalqaro tajribalarni, turli sohalar va tarmoqlardagi xorijiy mutaxassislarning ekspert fikrlarini umumlashtiradi.
O‘zbekiston Respublikasini 2035-yilgacha uzoq muddatli rivojlantirish strategiyasi bo‘yicha takliflarni ishlab chiqish “Buyuk kelajak”ning asosiy vazifalaridandir.
“Buyuk kelajak” vazirlikka maslahat xizmatlarini beg‘araz tarzda ko‘rsatadi.
Izoh (0)