Ўзбекистон Республикаси Энергетика вазирлиги ва «Буюк келажак» ХННТ 5 мартда ўзаро англашув тўғрисидаги меморандумни имзолади. Бу ҳақда вазирлик матбуот хизмати хабар берди.
Ҳужжат Энергетика вазири Алишер Султонов ва «Буюк келажак» ХННТ ижрочи директори Зуҳра Азимова томонидан имзоланди.
Ҳамкорлик доирасида томонлар мамлакат энергетика соҳасини ислоҳ қилиш ва уни жадал ривожлантиришга таъсир кўрсатишга қодир лойиҳаларни муҳокама қилиш ва таклиф қилиш мақсадида қўшма эксперт гуруҳини ташкил этиш тўғрисида келишиб олди.
«Буюк келажак» ХННТ нинг асосий вазифаларидан бири – турли соҳаларда салмоқли хорижий тажриба орттирган ватандошларимизни бирлаштириш, амалга оширилаётган ўзгаришлар самарадорлигини ошириш, давлат ва жамиятни ҳар томонлама жадал ривожлантириш учун Ўзбекистон иқтисодиёти ҳамда ижтимоий соҳасининг турли соҳаларида эксперт ёрдамини кўрсатишдан иборат.
Меморандумга мувофиқ, томонлар илғор хорижий тажрибани ҳисобга олган ҳолда Ўзбекистон Республикаси энергетика секторини янада жадал ривожлантириш мақсадда ҳамкорлик қилишни режалаштирмоқда. Бунга хусусан қуйидагилар бўйича таклифларни ишлаб чиқиш киради: мамлакат ёқилғи-энергетика комплексини ривожлантириш бўйича устувор йўналишларни амалга ошириш; электр энергия ва нефть-газ соҳаларини ислоҳ қилиш; юқори даражали саноат ва экологик хавфсизликни таъминловчи замонавий технологияларидан фойдаланган ҳолда қайта тикланадиган энергия манбаларини ва инфраструктурани қуриш ва бошқалар.
Кўзда тутилишича, томонлар таълимий семинарларни ташкил қилиш, музокараларни ўтказиш учун етакчи мутахассисларни жалб қилиш, қарорлар қабул қилиш ва бошқа масалалар бўйича ҳамкорлик қилиши мумкин.
Маълумот учун,«Буюк келажак» ХННТ нинг асосий органи ватандошларни – хорижда муваффақиятли иш тажрибасига эга мутахассисларни бирлаштирувчи Экспертлар кенгашидир. Кенгаш халқаро тажрибаларни, турли соҳалар ва тармоқлардаги хорижий мутахассисларнинг эксперт фикрларини умумлаштиради.
Ўзбекистон Республикасини 2035 йилгача узоқ муддатли ривожлантириш стратегияси бўйича таклифларни ишлаб чиқиш «Буюк келажак»нинг асосий вазифаларидандир.
«Буюк келажак» вазирликка маслаҳат хизматларини беғараз тарзда кўрсатади.
Изоҳ (0)