23-fevral kuni Samarqand viloyati Paxtachi tumani 2-umumta’lim maktabining Yoshlarni chaqiriqqacha tayyorlash fani o‘qituvchisi D.B maktabning 11-sinf o‘quvchisi J.X.ni urib tan jarohati yetkazganligi natijasida J.X.ning talog‘i yorilib ketganligi to‘g‘risida xabar bergan edik.
Sodir bo‘lgan holat yuzasidan “Daryo” muxbiri Farhod Norbo‘tayev jurnalistik surishtiruv olib bordi.
Ma’lumotlarga ko‘ra, Paxtachi tumanidagi 2-umumta’lim maktabida ichki turizmni rivojlantirish maqsadida sinflar kesimida sayohat aksiyasi tashkil qilingan. Ushbu aksiya shartlariga ko‘ra, davomat, tartib-intizom, bilim va maktab formasini yaxshi tashkil qilgan sinf 1-mart kuni Buxoro shahriga sayohatga borishi belgilangan. Aksiyada maktabning 11-sinfi yetarlicha ballni to‘plab, Buxoro shahriga borish imkoniyatiga ega bo‘lgan.
23-fevral kuni S.M. 11-sinflarga matematika fanidan dars o‘tayotganda maktabning YoChT fani o‘qituvchisi, 1991-yilda Navoiy viloyatining Navbahor tumanida tug‘ilgan, oliy ma’lumotli D.B. hamda maktabning yoshlar yetakchisi, 1995-yilda Navoiy viloyatining Nurota tumanida tug‘ilgan, oliy ma’lumotli A.G‘. o‘quvchilarning formasini ko‘zdan kechirish maqsadida reyd o‘tkazgan.
Yoshlar ittifoqining Paxtachi tuman kengashi raisi Shahob Halilovning ma’lum qilishicha, o‘sha kuni 11-sinf o‘quvchisi J.X. maktabga sport kiyimida kelgan. Reyd tashkilotchilari tomonidan unga tushuntirish ishlari olib borilgan. Tushuntirish ishlari olib borish jarayonida o‘zaro janjallashishi natijasida YoChT fani o‘qituvchisi D.B. J.X.ning qorin qismiga urgan.
– Maktabda yoshlar yetakchi o‘quvchilarning davomati, o‘quv formasi va tartibi yaxshi bo‘lsa, Buxoroga borish aksiyasini tashkil qilgan. Yoshlar yetakchisi bilan birgalikda YoChT o‘qituvchisi ham 11-sinfga kirgan. O‘sha kuni jabrlanuvchi formada bo‘lmagan. Qolaversa, o‘qituvchiga gap qaytargan. Natijada YoChT o‘qituvchisi D.B va J.X o‘zaro janjallashib qolgan, – deydi Shahob Halilov. — O‘qituvchi o‘quvchini tartibga solish maqsadida urgan. Voqeani to‘liq o‘rgandik. Maktabning yoshlar yetakchisi A.G‘. o‘quvchini urmaganligi oydinlashdi.
Voqea sodir bo‘lgan kuni, ya’ni 23-fevral kuni kechga yaqin J.X. sog‘lig‘idan shikoyat qilib, tuman markaziy shifoxonasiga murojaat qilgan. Shifokorlarning tibbiy xulosasiga ko‘ra, J.X.ning taloq a’zosi yorilganligi aniqlangan. 24-fevral kuni unga shoshilinch jarrohlik yordami ko‘rsatilgan.
Samarqand viloyat sog‘liqni saqlash boshqarmasi matbuot xizmati rahbari Eldor Muhammadiyevning ma’lum qilishicha, Paxtachi tuman tibbiyot birlashmasining malakali mutaxassislari tomonidan o‘z vaqtida amalga oshirilgan jarrohlik amaliyoti natijasida J.X.ning salomatligi yaxshilangan.
– Tuman tibbiyot birlashmasiga murojaat qilgan J.X.ni shifokorlar tibbiy tekshiruvdan o‘tkazgan. Tekshiruv xulosalariga ko‘ra, uning taloq a’zosi yorilganligi aniqlangan. Unga tibbiyot birlashmasining mutaxassislari tomonidan tezda shoshilinch jarrohlik yordami ko‘rsatilgan, – deydi Eldor Muhammadiyev. – Ayni paytda hech qanday asorati qolmagan. Tekshiruv jarayonida bolaning o‘pkasi ozgina shamollaganligi aniqlandi. Ayni paytda bu borada ham aniq tashxislar asosida davolash ishlari olib borilmoqda. Qolaversa, bemor Respublika shoshilinch tez yordam ilmiy markazi Samarqand filialining sanitar aviatsiya xizmati mutaxassisi Azim Ulug‘murodov tomonidan ko‘rikdan o‘tkazilib, operatsiya standart asosida olib borilganligi aytilgan. Hozirda J.X. bosh shifokor nazoratida.
Paxtachi tuman xalq ta’limi bo‘limi mudiri Vali Mardonovning aytishicha, 2-umumta’lim maktabidagi holat to‘liq o‘rganib chiqilib YoChT fan o‘qituvchisi D.B. hamda yoshlar yetakchisi A.G‘. vazifasidan ozod etilgan.
Samarqand viloyat Ichki ishlar boshqarmasi matbuot xizmati rahbari Shirin Normatovaning ma’lum qilishicha, 23-fevral kuni sodir bo‘lgan voqea o‘sha kunning o‘zida Paxtachi tuman IIBning navbatchilik qismida ro‘yxatdan o‘tkazilib, IIB nazoratiga olingan. Holat yuzasidan olib borilgan tergov-surishtiruv natijalari ko‘ra, 1-mart kuni D.B.ga nisbatan O‘zbekiston Respublikasi Jinoyat Kodeksining 104-moddasi (qasddan badanga og‘ir shikast yetkazish) 1-qismi bilan jinoyat ishi qo‘zg‘atilgan. Ushbu modda bo‘yicha aybdor deb topilgan shaxsga uch yildan besh yilgacha ozodlikni cheklash yoki uch yildan besh yilgacha ozodlikdan mahrum qilish jazosi tayinlanadi. Ichki ishlar vazirligi axborotiga ko‘ra, D.B. ushlangan.
Izoh (0)