Rossiyaning Saratov viloyatida yo‘l-transport hodisasini sodir etishda ayblanayotgan haydovchiga nisbatan hukm chiqarildi. Avariya oqibatida o‘zbekistonlik besh nafar muhojir halok bo‘lgan edi, deb yozadi “Podrobno.uz”.
2018-yilning 17-noyabrida Saratov viloyatidagi temir yo‘l kesishmasida avtobus va yuk poyezdi to‘qnashib ketgan edi. Bunga haydovchining temir yo‘l o‘tish qismidan harakatlanish qoidasini buzganligi sabab bo‘lgan. Oqibatda avtobusdagi yetti kishidan besh nafar yo‘lovchi halok bo‘lgan. Avtobus Qozog‘istondan Rossiyaga yo‘l olgan edi.
“Ish bo‘yicha figurant qozog‘istonlik 62 yoshli haydovchi bo‘lib, surishtiruv davomida u texnik nosoz avtobusni boshqarganligi aniqlangan”, — deya ta’kidladi RF IIV Saratov viloyati bo‘yicha Bosh boshqarmasi xabarida.
Haydovchining ehtiyotsizligi fojiali oqibatlarni keltirib chiqarganligi ma’lum qilinmoqda. U svetoforning taqiqlovchi signali, shuningdek, yaqin kelayotgan yuk poyezdining xavfli darajada yaqinligini e’tiborga olmasdan temir yo‘l kesishmasiga chiqqan.
Sud haydovchiga nisbatan ikki yilu olti oylik qamoq jazosini tayinladi.
Izoh (0)