Samarqandda 20 ming so‘m evaziga o‘z uyida fohishaxona tashkil qilgan shaxs ushlandi

Samarqand viloyati IIB transportda JXT bo‘limiga Jomboy tumani Naymantepa mahalla fuqarolar yig‘inida yashovchi R.R. ariza bilan murojaat qilib, unda Samarqand shahar Cho‘ponota massivi 28-uyda yashovchi Sh.G‘. ismli shaxs, o‘z yashash uyida pul evaziga fuqarolarga jinsiy aloqa qilish uchun sharoit yaratib berayotganligini ma’lum qilgan hamda qonuniy chora ko‘rishlikni so‘ragan.

Samarqand viloyat hokimligi matbuot xizmatining “Daryo”ga ma’lum qilishicha, ushbu murojaat asosida bo‘linma xodimlari tomonidan 2019-yil 16-fevral kuni o‘tkazilgan tadbir davomida Samarqand shahar Cho‘ponota massivi 28-uyda yashovchi, 1962-yilda tug‘ilgan Sh.G‘. ushbu manzilda joylashgan yashash uyida tadbirga jalb qilingan “R.R.” va “X.M.”larga jinsiy aloqa qilishlari uchun uyidan alohida xona ajratib berib, shart-sharoit yaratgani uchun 20 ming so‘m pul olgan vaqtida ashyoviy dalillar bilan ushlangan.

2019-yil 23-fevral kuni Samarqand viloyati IIB transportda JXTB huzuridagi tergov bo‘limi tomonidan to‘plangan hujjatlar bo‘yicha jinoyat kodeksining tegishli moddalari bilan fuqaro Sh.G‘.ga nisbatan jinoyat ishi qo‘zg‘atilgan. Fuqaro Sh.G‘. tilxat orqali ochiqda qoldirilgan.