Россиянинг Саратов вилоятида йўл-транспорт ҳодисасини содир этишда айбланаётган ҳайдовчига нисбатан ҳукм чиқарилди. Авария оқибатида ўзбекистонлик беш нафар муҳожир ҳалок бўлган эди, деб ёзади «Podrobno.uz».
2018 йилнинг 17 ноябрида Саратов вилоятидаги темир йўл кесишмасида автобус ва юк поезди тўқнашиб кетган эди. Бунга ҳайдовчининг темир йўл ўтиш қисмидан ҳаракатланиш қоидасини бузганлиги сабаб бўлган. Оқибатда автобусдаги етти кишидан беш нафар йўловчи ҳалок бўлган. Автобус Қозоғистондан Россияга йўл олган эди.
«Иш бўйича фигурант қозоғистонлик 62 ёшли ҳайдовчи бўлиб, суриштирув давомида у техник носоз автобусни бошқарганлиги аниқланган», — дея таъкидлади РФ ИИВ Саратов вилояти бўйича Бош бошқармаси хабарида.
Ҳайдовчининг эҳтиётсизлиги фожиали оқибатларни келтириб чиқарганлиги маълум қилинмоқда. У светофорнинг тақиқловчи сигнали, шунингдек, яқин келаётган юк поездининг хавфли даражада яқинлигини эътиборга олмасдан темир йўл кесишмасига чиққан.
Суд ҳайдовчига нисбатан икки йилу олти ойлик қамоқ жазосини тайинлади.
Изоҳ (0)