Samarqand viloyatining Samarqand tumani Badal mahallasi raisi 61 yoshli U.A. kadastr hujjatlarini rasmiylashtirish uchun MFY ma’lumotnomasini berish evaziga fuqarodan 400 dollar talab qilgan. Bu haqda viloyat hokimligi matbuot xizmati “Daryo”ga xabar berdi.
Shohjahon mahallasida yashovchi fuqato B.B. mahalla raisining ta’magirligi haqida huquq-tartibot organlariga ariza bilan chiqdi. Arizaga ko‘ra B.B.ga O‘zbekistonda o‘tkazilayotgan o‘zboshimchalik bilan qurilgan turar joylarga nisbatan mulk huquqini e’tirof etish bo‘yicha aksiya doirasida o‘zboshimchalik bilan qurilgan uy-joyining kadarst hujjatlarini rasmiylashtirish uchun MFY ma’lumotnomasi kerak bo‘lgan. Mahalla raisi ma’lumotnoma berish evaziga 400 dollar talab qilgan.
20-fevral kuni iqtisodiy jinoyatlarga qarshi kurash departamenti Samarqand tuman bo‘limi, tuman prokuraturasi va tuman IIB xodimlari bilan hamkorlikda o‘tkazilgan tezkor tadbirda Badal MFY raisi U.A. tadbir ishtirokchisi “Anvar” ismli shaxsdan 500 ming so‘m pullarni ta’magirlik yo‘li bilan olayotganda qo‘lga olingan.
Mazkur holat yuzasidan U.A.ga nisbatan jinoyat ishi qo‘zg‘atilib, tergov harakatlarini olib borishlik uchun ish Samarqand tuman prokuraturasiga yuborilgan. Fuqaro U.A. tilxat asosida ochiqda qoldirilgan.
Izoh (0)