“Rezina” tuxumlar Qirg‘izistonga qayerdan olib kelinganligi ma’lum bo‘ldi

Kuni kecha qizg‘in bahsga sabab bo‘lgan “rezina” tuxumlar O‘sh shahriga Issiqko‘l viloyatidan keltirilgan, deb xabar qildi Sputnik Qirg‘iziston Veterinariya va fitosanitariya bo‘yicha davlat inspeksiya rahbari Kalisbek Jumakanovga tayanib.

Jumakanov jurnalistlarga Veterinariya va fitosanitariya bo‘yicha davlat inspeksiyasi xizmat tekshiruvini o‘tkazib, video qahramonini topganini ma’lum qildi.

“Erkak tuxumlarni O‘shdagi “Archa” mini-bozorida xarid qilganini ma’lum qildi. Ushbu tuxumlar Issiqko‘l viloyatidan keltirilgani aniqlandi. Hammasi ekologik tabiiy, lekin shunga qaramasdan mahsulot tarkibini aniqlash maqsadida uni laboratoriyaga topshirdik ”, — dedi u.

Jumakanov tuxumlar boshqa davlatlardan keltirilganligi haqidagi ma’lumotni rad etdi. Shuningdek, u Issiqko‘ldagi korxonada tekshiruv boshlanganini qo‘shimcha qildi.

Eslatib o‘tamiz, kuni kecha Internetda Qirg‘izistonda “rezina” tuxum paydo bo‘lganligi haqidagi xabar qizg‘in muhokama qilindi. Qirg‘iziston fuqarosining so‘zlariga ko‘ra, pishirilgan tuxum sarig‘i “rezina” bo‘lib chiqqan. Uning fikriga ko‘ra, bu tuxumlar Xitoyda ishlab chiqarilgan. Qirg‘iziston parrandachilik uyushmasi raisi Rustam Osmonaliyev uyushmaga bir necha marta kelib chiqishi noma’lum va sifati qoniqarsiz bo‘lgan tuxumlar O‘zbekiston hududidan kelayotganligi haqida xabar berilgani haqida ma’lum qildi. O‘zbekiston Veterinariya qo‘mitasida bu ayblovlarni rad etishdi. O‘zbekistondan tuxum Afg‘oniston, Tojikiston va Eronga eksport qilinishi, shuningdek, O‘zbekistondan Qirg‘izistonga faqat kombikorm, qurt va biogumus o‘g‘it eksport qilinishini ma’lum qilingan edi.