Innovatsion rivojlanish vazirligi BMT Taraqqiyot dasturi bilan hamkorlikda tashkil etgan Innovatsiyalar va boshqaruv yechimlari laboratoriyasi jamiyat uchun muhim loyihalar muhokamasiga bag‘ishlangan qator tadbirlarni amalga oshirmoqda. Bu haqda “Daryo”ga vazirlik matbuot xizmati ma’lum qildi.
13-fevral kuni Job Cafe mobil dasturining demo varianti taqdimoti va ushbu loyihani amalga oshirish mexanizmlarini amalga oshirish bo‘yicha davra suhbati o‘tkazildi.
— Mazkur dastur mobil telefoni orqali ishlaydi, – deydi dastur muallifi, Ilg‘or texnologiyalar markazi yetakchi mutaxassisi Rustam Ibrohimov. — Unda kunlik ish qidirayotgan fuqarolar ro‘yxati shakllantirib boriladi. Ro‘yxatlar ish qidiruvchilar hamda hududiy agentlar, yagona darcha, sall centre operatorlari yordamida tuzilishi nazarda tutilgan bo‘lib, kunlik ish qidirayotgan fuqarolar haqidagi ma’lumotlar shaffofligi ta’minlanadi. Bu o‘z navbatida ham bir martalik ish beruvchilar, ham bir martalik ish qidiruvchilarga qulaylik tug‘diradi.
Dastur faqat bir martalik ish qidiruvchilarni ish bilan ta’minlab, bir martalik yumushini amalga oshirish uchun ish kuchi yollagan fuqarolarning talablarini qondirish bilan chegaralanib qolmasligi alohida ta’kidlandi. Loyiha ish qidiruvchilar, deylik, har uch oyda bir marotaba shifokor ko‘rigidan o‘tishlari, har bir ish qidiruvchiga alohida ID karta ochilishi yoki QR kod berilishi, ularning ijtimoiy muhofaza qilinishi kabi masalalarni hal etishga ham qaratilgan.
Loyiha bir martalik ish qidiruvchilarning huquqlari buzilmasligiga xizmat qiladi. Xizmatchilarning bir martalik shartnoma bilan xizmat ko‘rsatishlari ishchi va ish beruvchi o‘rtasida yuzaga kelishi mumkin bo‘lgan nizolarni hal qilishga asos bo‘ladi. Bundan tashqari, har bir ishchi/xizmatchi uchun mehnat daftarchasi ochilishi va fuqarolarning istagiga ko‘ra ma’lum miqdordagi mablag‘larning tegishli davlat idoralariga o‘tkazilishi keyinchalik ularning pensiya ta’minotiga ijobiy ta’sir ko‘rsatishiga zamin yaratadi.
Dastur muallifi mazkur loyiha hozirda mavjud bo‘lgan ijtimoiy tarmoqlardagi ish qidirish guruhlari, turli saytlardan farqi, uning aynan muayyan malakaga va kasbiy ko‘nikmalarga ega bo‘lmagan shaxslar uchun mo‘ljallangaligini qayd etdi. Mazkur loyiha bugungi kunda “mardikorlar” atamasi bilan tilga olinadigan ijtimoiy qatlamning manfaatlari uchun xizmat qiladi. O‘z navbatida, bir martalik ish qidiruvchilar xizmatlaridan foydalanayotgan fuqarolar ham notanish odamlar tomondan amalga oshirilishi mumkin bo‘lgan noqonuniy harakatlardan himoyalanadi.
Loyiha Bandlik va mehnat munosabatlari vazirligi, Ichki ishlar vazirligi, Xotin-qizlar qo‘mitasi, Pensiya jamg‘armasi, Sog‘liqni saqlash vazirligi, Yoshlar ittifoqi hamda boshqa manfaatdor idora va muassasalar bilan hamkorlikda amalga oshirilishi kutilmoqda.
Izoh (0)