“O‘zagrotexsanoatxolding” AJ tarkibidagi tizim korxonalar tomonidan zamonaviy elektrotraktorlar ishlab chiqarish loyihasi bo‘yicha ish boshlandi. Bu haqda “O‘zagrotexsanoatxolding” AJ matbuot xizmati “Daryo”ga xabar berdi.
Ushbu loyihani amalga oshirishda “O‘zagrotexsanoatxolding” AJ Avstriyaning dunyoga mashhur “AVL” kompaniyasi bilan hamkorlikni yo‘lga qo‘yadi.
Bu haqda 12-fevral kuni “O‘zagrotexsanoatxolding” AJ rahbariyati hamda “AVL” kompaniyasi vakillari o‘rtasida bo‘lib o‘tgan uchrashuvda ma’lum qilindi.
Shuningdek uchrashuvda “O‘zagrotexsanoatxolding” AJ tarkibidagi tizim korxonalar tomonidan ishlab chiqarilayotgan 100 ot kuchigacha bo‘lgan traktorlarni to‘liq elektrlashtirish bo‘yicha muzokaralar olib borildi. Unga ko‘ra 2019-yil yakunigacha “AVL” kompaniyasi yangi elektrotraktorlarning konseptual loyihalarini tayyorlaydi. Ilk namunalar esa “O‘zagrotexsanoatxolding” AJ tarkibidagi tizim korxonalar tomonidan 2021-yilda ishlab chiqariladi.
“Bunday zamonaviy traktor modellari 180 kilovattli elektrodvigatellarga ega bo‘ladi va deyarli shovqin chiqarmaydi. Shu bilan birga ularni ta’mirlash juda oson bo‘ladi. Yana bir ahamiyatli jihati shundaki bunday zamonaviy elektrotraktorlardan foydalanish fermerlar va dehqonlarning yoqilg‘i hamda ehtiyot qismlari uchun katta mablag‘ sarflashlarining oldini oladi” – deydi “O‘zagrotexsanoatxolding” AJ boshqaruvi raisi Muxtor Karimov.
Izoh (0)