Инновацион ривожланиш вазирлиги БМТ Тараққиёт дастури билан ҳамкорликда ташкил этган Инновациялар ва бошқарув ечимлари лабораторияси жамият учун муҳим лойиҳалар муҳокамасига бағишланган қатор тадбирларни амалга оширмоқда. Бу ҳақда «Дарё»га вазирлик матбуот хизмати маълум қилди.
13 февраль куни Job Cafe мобил дастурининг демо варианти тақдимоти ва ушбу лойиҳани амалга ошириш механизмларини амалга ошириш бўйича давра суҳбати ўтказилди.
— Мазкур дастур мобил телефони орқали ишлайди, – дейди дастур муаллифи, Илғор технологиялар маркази етакчи мутахассиси Рустам Иброҳимов. — Унда кунлик иш қидираётган фуқаролар рўйхати шакллантириб борилади. Рўйхатлар иш қидирувчилар ҳамда ҳудудий агентлар, ягона дарча, салл cентре операторлари ёрдамида тузилиши назарда тутилган бўлиб, кунлик иш қидираётган фуқаролар ҳақидаги маълумотлар шаффофлиги таъминланади. Бу ўз навбатида ҳам бир марталик иш берувчилар, ҳам бир марталик иш қидирувчиларга қулайлик туғдиради.
Дастур фақат бир марталик иш қидирувчиларни иш билан таъминлаб, бир марталик юмушини амалга ошириш учун иш кучи ёллаган фуқароларнинг талабларини қондириш билан чегараланиб қолмаслиги алоҳида таъкидланди. Лойиҳа иш қидирувчилар, дейлик, ҳар уч ойда бир маротаба шифокор кўригидан ўтишлари, ҳар бир иш қидирувчига алоҳида ID карта очилиши ёки QR код берилиши, уларнинг ижтимоий муҳофаза қилиниши каби масалаларни ҳал этишга ҳам қаратилган.
Лойиҳа бир марталик иш қидирувчиларнинг ҳуқуқлари бузилмаслигига хизмат қилади. Хизматчиларнинг бир марталик шартнома билан хизмат кўрсатишлари ишчи ва иш берувчи ўртасида юзага келиши мумкин бўлган низоларни ҳал қилишга асос бўлади. Бундан ташқари, ҳар бир ишчи/хизматчи учун меҳнат дафтарчаси очилиши ва фуқароларнинг истагига кўра маълум миқдордаги маблағларнинг тегишли давлат идораларига ўтказилиши кейинчалик уларнинг пенсия таъминотига ижобий таъсир кўрсатишига замин яратади.
Дастур муаллифи мазкур лойиҳа ҳозирда мавжуд бўлган ижтимоий тармоқлардаги иш қидириш гуруҳлари, турли сайтлардан фарқи, унинг айнан муайян малакага ва касбий кўникмаларга эга бўлмаган шахслар учун мўлжаллангалигини қайд этди. Мазкур лойиҳа бугунги кунда «мардикорлар» атамаси билан тилга олинадиган ижтимоий қатламнинг манфаатлари учун хизмат қилади. Ўз навбатида, бир марталик иш қидирувчилар хизматларидан фойдаланаётган фуқаролар ҳам нотаниш одамлар томондан амалга оширилиши мумкин бўлган ноқонуний ҳаракатлардан ҳимояланади.
Лойиҳа Бандлик ва меҳнат муносабатлари вазирлиги, Ички ишлар вазирлиги, Хотин-қизлар қўмитаси, Пенсия жамғармаси, Соғлиқни сақлаш вазирлиги, Ёшлар иттифоқи ҳамда бошқа манфаатдор идора ва муассасалар билан ҳамкорликда амалга оширилиши кутилмоқда.
Изоҳ (0)