12-fevral, seshanba kuni futbol bo‘yicha Yevropa Chempionlar Ligasining 1/8 final bahslariga start beriladi.
Nimchorak finalining markaziy to‘qnashuvlaridan birida Ole-Gunnar Sulsher qo‘l ostidagi “Manchester Yunayted” klubi o‘z maydonida Tomas Tuxel boshqaruvidagi PSJ jamoasi bilan bahsga kirishadi.
Qayd etish joiz, “mankunianlar” musobaqaning “H” guruhida 10 ochko to‘plagan holda 2-o‘rinda guruh bahslarini yakunlagandi. Parij klubi esa “C” guruhida 11 ochko bilan birinchi o‘rinni egallab, pley-offga chiqqandi.
Shu kuni Rimning “Roma” klubi “Olimpiko” stadionida “Portu” jamoasi bilan o‘ynaydi. Ikkala uchrashuv ham Toshkent vaqti bilan tungi soat 01:00 da boshlanadi.
Eslatib o‘tamiz, Eusebio di Franchesko shogirdlari guruh bahslari yakuniga ko‘ra “G” guruhida 9 ochko, Portugaliya klubi esa “D” guruhida 16 ochko jamg‘arib, 1/8 final yo‘llanmasini qo‘lga kiritgandi.
Ma’lumot uchun, musobaqaning nimchorak final javob uchrashuvlari joriy yilning 6-mart kuni bo‘lib o‘tadi.
Yevropa Chempionlar Ligasi
1/8 final bahslari
12-fevral, seshanba
“Manchester Yunayted”—PSJ 01:00
“Roma”—“Portu” 01:00
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)